Марий Элым вуйлатыше Александр Евстифеев COVID-19 деч прививкым ыштыше медицине пашаеҥ-влаклан 39 млн. теҥгем ешарен ойырен.
Тиде окса у коронавирус инфекций деч вакцинацийым эртарыше медик-влаклан ешартыш нагрузко дене пашам ыштымыштлан кумылаҥдыме шот дене выплатым тӱлаш палемдалтын.
22 сентябрьлан налмаште Марий Элыште коронавирус деч 178192 еҥ прививкым ыштыктен. 19 медицине тӧнежыште вакцинацийым эртарыме 10 пункт ден куснылшо 71 пункт пашам ыштат. Марий Элым вуйлатышын кӱштымыж почеш, Йошкар-Олаште Сеҥымашын ХХХ идалыкше лӱмеш тӱвыра полатыште Вакцинаций рӱдерым да Россий сбербанкын пӧлкаштыже COVID-19 да грипп деч прививкым ыштыме у пунктым почмо.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
