Россий Федерацийын Федеральный Собранийжын Кугыжаныш Думыжын депутатше Светлана Солнцева Марий Элыште август мучаш гыч сентябрь тӱҥалтыш марте лийын да кок арня жапыште шагал огыл пашам ыштен шуктен.
Мутлан, вашлиймашым гына латкоктым, тыгак еҥ-влаклан 2 тематический приемым эртарен. Светлана Юрьевна республикысе икмыняр районысо депутат-влак погынымашын председательышт, туныктышо да пашаче коллектив-влакын еҥышт дене вашлийын.
Приемлашке еҥ-шамыч депутат деке тургыжландарыше тӱрлӧ йодыш дене толыныт. Нуно начар тазалыкан еҥ-влакын илыш условийыштым саемдаш, школым, школ автобус кудалыштме маршрутышто улшо корным тӧрлаташ да уым ышташ, тоштемше пӧртла гыч вес вере илаш кусараш кӱлмӧ, шуко шочшан еш-влаклан мландым ойырымо, моло нерген ойленыт да полшаш йодыныт. Нине йодышым вараже Светлана Солнцева Марий Эл Республик правительстве председательын икымше алмаштышыже Михаил Васютин дене 7 сентябрьыште эртыше вашлиймаште каҥашен.
Школлаште леведышым ачалыме, окна блок-влакым вашталыме, кӱварым тӧрлатыме, тунемше-влаклан учебникым ситарыме йодыш-влак тылеч ончычсо вашлиймашлаштат каҥашалтыныт. Сандене нунын кокла гыч шуко пашажым ыштенат шуктымо. Но образований сферыште улшо объект-влак дене кылдалтше йодыш-шамыч эше рашемдалтде кодыныт. Эн кугу тӱткыш «Йоча спорт» ден «Шочмо кундемын тӱвыраже» партийный проект-влакым илышыш пуртышашлан ойыралтын.
Образований системыште улшо нелылык-влак нерген депутат Марий Эл Республикыште Тӱҥ федеральный инспектор Петр Журавлев дене мутланен. Тушто, мутлан, Кужэҥер районысо Йӱледӱр селаште йочасадым да школым чоҥышаш нерген ойленыт. Школ-йочасадым ышташ ямдылыме проект ден смете документацийым уэш экспертизыш колтымо. Йӱледӱр селаште тунемме учрежденийым ыштыме да школ автобус-влак кудалыштме маршрут корным ачален шуктышаш йодыш-влакым Светлана Солнцева контрольыш налын.
Тыгак депутат окса шотышто чӱдын илыше еш-влаклан икшывыштым школыш погаш кажне ийын полша. Теният тыгак ыштен. Тудо «Единый Россий» партийын эртарыме «Икшывым школыш пого» акцийышкыже ушнен.
Л.Камалетдинова.
