«Дебют» образцовый ансамбль икымше гана Крымыште эртаралтше «Культурное достояние» онлайн-проектыш ушнен да кумшо степенян лауреат лӱмым сеҥен налын.
Конкурсыш Российын тӱрлӧ регионжо, тыгак Украина гыч участник-влак ушненыт. Нунын коклаште мурышо, куштышо, театр, цирк, семӱзгарым шоктышо коллектив, образцовый ансамбль да посна исполнитель-влак лийыныт.
Марий Элын чапшым Йошкар-Оласе 26-шо №-ан гимназий пеленысе «Дебют» куштышо да спорт клуб арален.
— Кызыт куштылго огыл жапыште улына гынат, усталык шӱлышан, чолга улмынам ончыкташ да сеҥышыш лекташ йӧн уло, — палемден ансамбль вуйлатыше Анна Соколова.
Лауреат лӱм налше коллективлан Сочиште эртаралтше «Российын талантан икшывыже-влак» национальный премийыш ӱжмашым пуэныт.
А. БАЙКОВА
