29 январьыште Красногорский психоневрологический интернатыште Афганистан гыч совет войскам лукмылан 30 ий теммылан пӧлеклалтше «Зарница» спортивно-патриотический эстафете эртен. Тушто Красногорский, Шоя-Кузнецово, Кожласола да «Таир» психоневрологический интернатлаште илыше 50 утла еҥ участвоватлен.
Мероприятийыш Марий Эл правительстве председательын алмаштышыже Илга Дравниеце, социальный вияҥмаш министр Ольга Фёдорова, Красногорский кундемыште илыше воин-афганец-влак Юрий Попов ден Александр Домрачев миеныт.
Участник-влак гранатым кышкеныт, миным кычалыныт, ече дене таҥасеныт, икымше медицине полышым пуэныт… Таҥасымаш сынан модышышто интернатлаште илыше-влак йӧршын вес могырым, эсогыл у велым почылтыныт. Поснак лидер койышан, физический да кӧргӧ виян, ур гай писе, чыла неле-йӧсым чытыше, жапыштыже шонен моштышо-шамыч ойыртемалтыныт. Тыгак команде-влакын икоян улмышт, соперникым иквереш сеҥаш тӧчымышт куандарен.
Тиде кечын «Икте чылан верч, чылан икте верч!» девизын мо нерген ойлымыжым кажныже умылен. Эсогыл наставник-влак ӧрдыжтӧ шоген огытыл, шке еҥыштлан лийме семын полшеныт, нунын верч тургыжланеныт.
«Зарницыште» Красногорский интернатыште илыше-влак сеҥеныт. Кокымшо верыш Кожласола интернатын участникше-шамыч лектыныт, кумшыш – Шоя-Кузнецово ден «Таир» интернатла гыч толшо-влак.
Эстафетым мучашлыме годым Илга Дравниеце тыгай сынан мероприятийын кӱлешлыкшым палемден да тудым жапын-жапын эртараш темлен.
М.ИВАНОВА.
