Эртыше кечылаште Кужэҥер районысо Басалай ял воктенысе пӱяште 12 да 14 ияш рвезе-влак шоло дене коштшыла вӱдыш каен коленыт.
Ты шотышто республикысе следственный комитетын Советский межрайоннный следственный управленийыже тӱткыдымылыклан кӧра кок еҥым колымашке шуктымо шотышто уголовный делам тарватен. Трагедийын амалже шымлалтеш. Прокуратурат ты пашаш ушнен.
Россий МЧС-ын Марий Элысе Тӱҥ управленийжын пресс-службыжын увертырымыж почеш, 14 июньышто Волжскышто, Юл эҥерыште, тыгак ик еҥ вӱдыш пурен каен, но тудым утарен кертыныт. Ты кечынак Козьмодемьянскыште вес еҥ колым кучымыж годым вӱдыш пурен каен да илыш дене чеверласен.
Козьмодемьянскыштак вес сынанрак случаят лийын. Полиций пашаеҥ-влак тушто рейд годым ийготыш шудымо кок рвезын тыглай пуш дене утарыше жилет деч посна эҥерыште коштмыштым ужыныт. Воктенышт кугыеҥ лийын огыл. А пушыжым нунылан родо-тукымжо пуэн. Ачашт ден авашт йоча-влакын эҥерыш лекмышт нерген паленыт. Полиций пашаеҥ-влак законный представитель-влак дене профилактике мутланымашым эртареныт да оласе администрацийын ийготыш шудымо-влакын пашашт шотышто комиссийышт ты шотышто шижтарымашым колтеныт.
Ончыктен кодыман, тений гына республикысе вӱд объектлаште чылаже 9 еҥын ӱмыржо кӱрылтын. Утарыше-влак эше ик гана шижтарат, вӱдыш пурымо годым поснак тӱткӧ лийман.
С.НОСОВА
