УВЕР ЙОГЫН

Вӱд ваштареш кайыман огыл

 

Россий МЧС-ын Марий Элысе Тӱҥ управленийжын пресс-службыжын увертарымыж почеш, тений республикысе вӱд объектлаште 29 еҥ илыш дене чеверласен. Тышечын визытынже  икшыве-влак лийыныт.

Пытартыш случай Йошкар-Оласе Изи Какшан эҥерыште лийын. Кок ӱдырым утарен кертыныт.

Кеҥеж пытымеш але жап уло, сандене вӱдыштӧ туткарыш логалын, шке илышым кошарташ огыл манын,  утарыше-влакын каҥашыштым ушештарена.

  • Вӱдыштӧ улмо годым кидым, йолым шӧн шупшын шынден гын, утыжым ӧрткаш огеш кӱл. Эн ончыч вӱд ӱмбалне кодаш тыршаш кӱлеш. Сандене тупыш савырнен возын ийман. Кертме семын шупшын шындыме чогашылым туржман. Серыште еҥ-влак улыт гын, нуным полшаш кычкыраш вожылман огыл.
  • Умшаш вӱдым нелында гын, вуйым вӱд ӱмбаке чотрак нӧлталын, кокыралтыман. Кид, йол дене чотрак тарванылда гын,  вӱдыштӧ шкем кутынь кучаш йӧн лектеш. Вара сер деке ийын каяш лиеш.  
  • Вӱд йогыныш, пордемыш логалында гын, утларак южым налын, вӱд йымаке кайыман, вара йогын почеш ӧрдыжкӧ чот шӱкалалтман да тӱжваке лекташ тыршыман.
  • Вӱд шудо коклаш логалында гын, кид-йол дене утыжым ида лупшкедыл. Тупыш вочса да вӱдыш пурымо велыш ласкан ийын каяш тыршыза.  Тиде ок полшо гын,  йолым мӱшкыр деке шупшылман да эркын кушкыл деч утлаш тыршыман.
  • Виян вӱд толкыныш логалында гын, тудын ваштареш ийман огыл. Толкын почешак ийын, эркын сер велыш корным налман.

С.Носова ямдылен.

 

Опубликовать в Одноклассники

Добавить комментарий