УВЕР ЙОГЫН

Вӱдын кӱлешлыкше нерген Марий Элыште мутланеныт

 

Вӱд — ик эн шерге пӱртӱс поянлык. Таклан огыл 22 мартыште Вӱд биоресурсын тӱнямбал кечыже палемдалтеш. А Марий Элыште ты кечын вӱдым аралыме дене кылдалтше чыла министертстве ден ведомствын специалистше-влак, иквереш погынен, кажне ийын гаяк «йыргешке ӱстел» йыр мутланымашым эртарат. Тений тудо Пӱртӱс поянлык, экологий да йырым-йырысе средам аралыме министерствыште эртен. 

Тушто Марий Элыште вӱд шапаш дене моштен пайдаланыме, йӱаш йӧршӧ вӱдым ситарыме, вӱд законодательствым шуктымо, тенйсе вӱдшор пагытым туткар деч посна эртарыме шотышто йодыш-влакым тарватеныт. Вӱд поянлыкнам арален кодымо йодышым ик эн тӱҥлан шотлыман, очыни. Паша шуко ышталтеш. Мутлан, тений республикыште Юл эҥерын вӱдышым лавыртыме деч утрышашлан эрыктыше 25 системым уэмден олмыкташ палемдыме. Йошкар-Олаште гын Изи Какшан эҥер сер пеленсе эрыктыме системе дене кылдалтше соруженийым ыштыме пашам шуйышаш улыт. Шошо вӱдшор годым плотина-влакым урылтмо деч аралыме паша ышталтеш. Специалист-влак палемдышт: вӱд поянлыкым арален кодаш манын пӱртӱсым аралыме йодыш дене кылдалтше чыла министерстве ден ведомство пашам пырля пашам ыштышаш улыт.

Йӱаш йӧршӧ вӱд республикыште ситышын уло, тудын качествыже шотышто Роспотребнадзорын Марий Элысе управленийжын специалистше-влак чот тыршат. Пытартыш кум ий жапыште йӱшашлык вуд дене кылдалтше пижедылше черат вашлиялтын огыл. Мутлан, кодшо ийын еҥ-влак деч 39 вуйшиймаш пурен. Тышечын 9  случайже гына чыныш лектын. Вӱдым йӱаш налме ик верым гына жаплан пытырыме. Титакан-влакым мут кучаш шогалтыме, административно наказатлыме, палемден управлений вуйлатыше С.Булатова.

С.Носова.

Опубликовать в Одноклассники

Добавить комментарий