СОЦИАЛ ИЛЫШ

Вӱдшорлан шарлаш корно петырна

Йошкар-Оласе Изи Какшан серыште, «Динамо» стадион кундемыште, вӱд ташлыме деч аралыше дамбым чоҥаш тӱҥалме нерген уверым колмеке, ушышкем эҥерын ты велнысе Заречный уремыштыже ик пӧртыш пачерлан пурен илыме жапем шарналтышым.  Кажне ийын, поснак шошо вӱдшор годым, Красноармейский Слобода гыч тӱҥалын ты урем мучаш марте вӱд дене темын. Урем веле огыл ташлен, пу пӧрткӧргын пелыже марте нӧлталтын. Озаватын вич казажым пӧрт туврашыш нӧлташ пернен гын, кажне шошым ешемлан илаш жаплан вес верым кычалаш логалын. Южо ийынже вӱдшор шым метрлан нӧлталтын.  

Вӱд деч аралалташ манын, ты дамбым лач тынар метрлан нӧлталын ышташ палемдыме. Тудо Водопроводный урем гыч тӱҥалын Красноармейский Слобода марте шуйналтеш. Дамбе «Динамо» стадионым, ты кундемыште верланыше 45 частный пӧртым, электровоштыр меҥгылам, Йошкар-Олан эҥер вес велныже илыше калыклан йӱшаш вӱдым тулышо станцийым аралаш тӱҥалеш.

Дамбым ышташ 113 миллион теҥгем ойырымо. Кушеч вара тиде оксаже лектын?

— Окса Марий Эл Республикын «Йырым-йырысе средам аралыме, пӱртӱс поянлыкым ончен-куштымо да пайдаланыме шотышто кугыжаныш программыж» почеш ойыралтын. 113 миллион теҥге гыч 90 процентше, але 98 миллион теҥге, федеральный бюджет гыч субсидий семын лиеш, 14 миллионжым республикын бюджетше пуа, — палдара Марий Элын Экологический лӱдыкшыдымылык, пӱртӱс дене пайдаланыме да калыкым аралыме департаментшын вӱд дене кылдалтше пашам виктарыме отделжын начальникше Елена Зыкова. – Тений да шушаш ийыште ты пашан икымше ужашыжым шукташ палемдыме. Тиде жапыште Красноармейский Слобода гыч тӱҥалын «Динамо» стадион мучаш марте дамбым нӧлталыт. 2019 ийыште вӱд деч аралалтме сооружений Водопроводный урем марте чоҥалтеш.

Кызыт тыште пашам тӱҥалме. Пашазе-влак сер мучко да йыр кушшо шоҥго пушеҥге ден вондерым руат. Дамбым нӧлташ проектым ямдылыме деч ончыч ПГТУ-н ученыйжо ден студент-влак ты кундемыште кушшо кажне гаяк пушеҥгым терген лектыныт да тыгай иктешлымашыш шуыныт: ужар кушкыл гыч 10 процентшым гына тазалан шотлымо. Молыжым чаманыде руен кораҥдаш лиеш.

А.АНДРЕЕВ.
Авторын фотожо.

Опубликовать в Одноклассники

Добавить комментарий