СПОРТ

Вячеслав Афанасьев: «Сайым ужын моштыман»

Кеҥеж каныш гынат, спортын тӱрлӧ видше дене шуко вере таҥасымаш, турнир, чемпионат але первенстве-влак эртат. Эн ончыч Российыште эртыше футбол дене тӱнямбал чемпионатым тарватыде нигузе ок лий. Футболым шукышт ончат, тудын верч тургыжланат. Мутлан, куштылго атлет улыт гынат, шукыштым ты видын фанатше семын палемдыман. Таче газетнан унаже – спортын ветеранже, таза илыш-йӱлан ӱшанле йолташыже, тӱрлӧ сынан таҥасымашын участникше, сеҥыше, тыгак призёр радамыште лийше, У Торъял кундемын эргыже В.Афанасьев.

– Вячеслав Никитьевич, очыни самырык годымак футболлан кумылаҥында?

– Йоча годсо жапна футбол дене кылдалтын. Школыш йолын коштынна, ӱчаш-ӱчаш куржынна. Теве тыге Немда школ гыч Йошкар-Памаш марте каенна, футболла модынна.  Ты вид ик эн ончылно лийын. Сандене тудым кызытат ончена, тудын верч тургыжланена.

– Российын сборный командыж верч тургыжланенда. Эше могай команде келша?

– Товарищеский матчлаште мемнан-влак начарынрак модыныт, а кок матч куаным конден. Кумшо вашлиймаште модын колтеныт, но нимат огыл, 1/8 финалыш лектынна. ¼ финалыштат сай модмашым ончыктышт. Тиде мыланна – кугу куан. Меат тыге кертына манын куанен онченна. Мӧҥгыштӧ модшын пырдыжшат полша, маныт. Мыланем Испанийын, Португалийын, Францийын сборныйышт келшат. Мо-гынат, Германий садак тале команде семын кодеш.

– Российын сборныйжын модмыжо келшен. Тренерже кузерак?

– Мемнан команде тачысе кечылан виянрак, талыракат. Палыдыме-влак улыт. Тренер Черчесоват – койышыж дене палыдыме, шкешотан, ончычсо капка орол. Уто мутым ок ойло. Футболист-влак вес семынрак модыт.  Такшым куанен мошташ кӱлеш. Модыш тиде модыш, а мече, йыргешке… Вурсаш эре лиеш. Мыйын шонымаште, сайжым ужын мошташ, тидлан куанаш кӱлеш. 

– Тугеже сай модмашым ончен куанаш веле кодеш. Болельщик-влакат тӱрлӧ улыт. Мутлан, южышт, матчлашке але иктаж вес таҥасымашлашке толмышт дене пуйто сеҥымашым кондат, тидлан ӱшанат. Южгунамже, можыч, тыгакат лиеш. Футбол дене француз болельщик, фанат пеленже агытаным сакен толын. Шуко вере тудым коштыкта. Те тыгайлан ӱшанеда? Те шкеже тӱрлӧ таҥасымашлаште вийдам тергенда, кызытат стартлашке лектыда, шкендан иктаж талисманда уло?

– Шкан ӱшанаш кӱлеш. Мыйын талисман монь уке. Эн тӱҥжӧ – палемдыме корным сайын куржын эрташ. Дистанцийыште кӧ кузе куржеш – раш коеш, кузе ямдылалтмат шижалтеш. Кажнын шке системыже. Адакшым жапым кузе ойырымыж дене кылдалтын. Шке вийлан, тазалыклан ӱшанаш кӱлеш. Корнышто йӱштыштӧ йӱштӧ, шокшо годым шокшо лиеш. Игечым ончалман, вургемым келыштарен чийыман. Тӱрлӧ игечылан ямде лийман. Тургыжландара: куржталмаш корнышто самырык-влак шагалрак улыт.

Йот элла гыч болельщик-влак толыт. Велосипед, трактор денат… Тыглай калыкше чыла вереат тыглай, проста, сай улыт, шонем. Кажнын шке койышыжо, йӱлаже, сандене тыште нимо удаже уке, шонем.

– Мемнан дене шкешотан, но пеш оҥай таҥасымаште, «Кикимыр-трофи» маналтеш, ик гана веле огыл вийым тергенда. Сеҥышат лийында…

– Тыге. Шкешотан экстремал-кросслан ПГТУ-н преподаватель-тренерже, теле полиатлон дене тӱнямбал кӱкшытан спорт мастер, ече дене СССР-ын, кеҥеж биатлон дене Российын спорт мастерже, физический культур да спортын отличникше Иван Иванович Рыбаков тӱҥалтышым ыштен да эртарен. Тале организатор, а организаторлан куштылгыжак огыл. Чаманен каласыман, пытартыш ийлаште ты таҥасымаш  ок эртаралт. Тӱҥ налмаште тудо  Йошкар-Ола воктенсе Пӱнчерыште эртаралтын. Тушко, экстремал кроссыш, Киров, Сыктывкар, Чебоксар, Тверь, Новочебоксарск да моло кундемла гычат лӱмын толыныт. Мый икымше гана веле участвоватлен омыл. Пеш кугу Рыбаковлан, молодец. Шкежат изинек спорт дене пеҥгыде кылым куча, молымат кумылаҥден мошта. Сай, поро йолташ. Шке ийготанем-влак коклаште  икымше верым налынам, ик гана гантикап йӧн дене куржмеке, икымше верыш лектынам. Икмыняр куп, ошма, эҥер да моло чарак-влак вашлиялтыт. Лийын тӱрлыжат. Купыштыжо ны ияш, ны куржаш ок лий, а финишыш шуаш кӱлеш. Кроссовкат киен кодеш. Йол эре ночко. Вуйышто, пылышыште ужар шудо кечылтеш, чылт ия иге гаяк веле коят. Ваш-ваш ончалын воштылат. Но пӱртӱсшӧ!.. Теве тыгай оҥай, шкешотан таҥасымаш мемнан денат эртаралтын.

– Тидлан чот ямдылалтман, жап шуко кӱлеш?

– Иван Иваныч купым эрыкта, шудым сола, корным ямдыла, терген лектеш… Шуко жап, чытымаш кӱлыт, тургыжланашат логалеш… Тудын таҥасымашыже эн поян лийын. Пӧлекшат эн чапле, икте-весе коклаште пеҥгыде кылым ыштен мошта. Воспитанникше-влакат сай кӱкшытыш шуыныт. А ме, куштылго атлет, ветеран-влакат тидлан ончылгоч ямдылалтынна. Иктеш кутырен келшен, ты таҥасымашым уэш илышыш пурташ оҥай ыле…

Кумданрак — «Марий Эл» газетын
2018 ий 17 июльышто лекше номерыштыже лудын кертыда.

Е.Эшкинина мутланен.

Опубликовать в Одноклассники

Добавить комментарий