Социальный сетьлаште сай уверым погымо шот дене Марий Элым вуйлатыше Александр Евстифеев губернатор-влакын рейтингыштышт икымше верыш лектын. Тудын нерген августышто соцмедиаште 2859 гана ушештарыме, увертарат Политический конъюнктур рӱдерын экспертше-влак.
Нуно А.Евстифеев дене кылдалтше пост-влакын 26,83 процент случайыштым сай семын акленыт, 4,27 процент случайыштым – уда семын. Сай материалын примержылан Цифровой технологий институтым да Козьмодемьянск олаште у поликлиникым почмо событийлам конденыт. Марий Элым вуйлатыше нерген чӱчкыдынжӧ «ВКонтакте» (58,28%), «Одноклассники» (12,21%) да «Telegram» (10,25%) социальный сеть-влакын авторышт возеныт.
Политический конъюнктур рӱдерын экспертше-влак регионым вуйлатыше-шамыч шотышто возымо комментарийлан чотышт ден содержанийыштымат акленыт. Марий кундемым вуйлатыше А.Евстифеев нерген сай комментарий августышто 2,9 процентлан шукырак лийын да 9,11 процентыш шуын, тыгодымак уда комментарий 2,28 процентлан ешаралтын да 9,71 процентыш лишемын. Августышто нейтральный манме комментарийын чотшо июльысо деч 5,2 процентлан иземын да 81,2 процент лийын.
Рейтингын кокымшо верышкыже Тула областьын губернаторжо Алексей Дюмин у ий полатым почмо да шочмо кечыжым эртарыме событийла дене логалын, кумшо верыш – Чукотка автономный округын губернаторжо Роман Копин РФ правительствым вуйлатыше Михаил Мишустин дене вашлиймыже да электровийлан тарифым иземдаш кӱлмӧ темлымашыж дене.
Социальный сетьлаште Бурят Республикын губернаторжо Алексей Цыденовым Байкал кундемысе экологий ситуаций да Мурманск областьын губернаторжо Андрей Чибисым Испанийыште налме кусараш лийдыме погыж шотышто эн чӱчкыдын вурсеныт – 25,92 да 24,91 процент.
М.ИВАНОВА
