21 ноябрьыште Марий Эл Республикым вуйлатыше Александр Евстифеев паша визит дене Москваште лийын. Тушто тудо Россий правительствын эртарыме «Транспорт арня – 2018» тӱнямбал отраслевой мероприятийыште участвоватлен.
Тиде мероприятийым Российын Транспорт министерствыже ынде латкокымшо ий эртара. Тудын тӱҥ шонымашыже – транспорт дене кылдалтше кӱлешан йодышлам каҥашаш да кугыжаныш кучем еҥ ден бизнес-сообществе-влак кокласе кылым пеҥгыдемдаш.
Ий еда эртаралтше мероприятий транспорт проблеме шотышто общероссийский да тӱнямбал серий-влакым уша. Тенийсе программыш «Российын транспортшо» латкокымшо тӱнямбал форумым, отрасльыште кӱкшытыш шумым ончыктышо выставкым, автомобиль, авиаций, кӱртньыгорно, теҥыз да эҥер транспортын пашам ыштымыж да вияҥмыж дене кылдалтше йодышлам лончылышо тӱрлӧ конференцийым да монь пуртымо.
«Транспорт арня – 2018» мероприятийым эртарыме кышкарыште А.Евстифеев палемдыме мероприятийлаште участвоватлен да икмыняр деловой вашлиймашым эртарен.
Марий Эл Республикын организаций да аналитике виктемжын уверже негызеш М.ИВАНОВА ямдылен.
