УВЕР ЙОГЫН

Врио Главы РМЭ. Александр Евстифеев «Лукоз» агрохолдинг дене палыме лийын

Врио Главы РМЭ

Александр Евстифеев «Лукоз» агрохолдинг дене палыме лийын

7 майыште республикым вуйлатыше Шернур районыш миен, «Лукоз» агрохолдингын  пашаж дене палыме лийын. Ончыч тудо Марий Элыште шӧрым перерабатлыше  ик эн ончыл предприятийлан шотлалтше  «Шернур сыр завод» ЗАО-н пашажым аклен. Тудым вуйлатыше Владимир Кожановын мутшо почеш, предприятийын сатужо республикыште веле гыл, тудын деч ӧрдыжтат  палыме.  «Кушкыл ӱй ден белокым ешарыде шӧр гыч ыштыме сатуна Российын европысо кумдыкыштыжо налше-влакын йӧртымашыштым сулен. Ме  Российысе рынкыште вернам пеҥгыдемдышаш верч чолган тыршена», — палемден   тудо.

Александр Евстифеев сырым ыштыме чумыр технологийым ончен лектын, тудын качествыж дене палыме лийын. Тыште кумдан палыме «Голландский», «Пошехонский», «Российский»  деч посна калыклан шагал палыме «Марсенталь», «Сернурский Халумис», «Рикотту» да тулеч молымат ыштат.

Сырзаводышто пашам ыштыше-влак дене мутланымыж годым Александр Евстифеев эн ончыч паша йӧн, пашадар кугыт нерген пален налын. Мут толмашеш, тыште кокла пашадар 25 тӱжем теҥгешке шуэш.

Вара республик вуйлатыше каза да шорык фермылам ончен лектын. Шорыкым шӧрлан кӧра кучымо  предприятий у гын,  «Лукоз» агрохолдингын каза фермыже мемнан элыште веле огыл, СНГ-ыштат эн кугу.  Российыш вес эл гыч кондымо зааненский урлык казан ик кумшо ужашыжым тыште ончат.

Александр Евстифеев производство культурын кӱшнӧ улмыжым, вольыкым кучымо кызытсе жаплан келшыше технологий дене пайдаланымым, селекций пашам шуктымым палемден. «Ме ужна, предприятий вияҥеш, технологий уэмеш, адакше импортный оборудованийым веле огыл, тыгак Российыште ыштыме эн сай техникым кучылтмылан кӧра. Тыште пашам ыштен моштышо коллектив тырша, сай пашадарым тӱлат да паша йӧным эре саемденак шогат. Тидыже еҥ-влакын эрласе кечылан ӱшаныштым луктеш», —  манын агрохолдинг дене палыме лийшыжла регион вуйлатыше. Йӧн дене пайдаланен, Александр Евстифеев  предприятийыште тыршыше-влакым Сеҥымаш кече дене саламлен.

Муниципальный образованийым вуйлатыше-влак дене ваш мутланымыже  йӧршын вес шонымашым коден. Администраций вуйлатыше да Депутат-влак погынымашын председательже дене  эртарыме кӱчык оперативный совещанийыште Александр Евстифеев район вуйлатыше-влакын муниципальный образованийысе экономикыште паша кузе воранымым начар палымышт нерген ойлен.

Е.Садовин.

 

 

Опубликовать в Одноклассники

Добавить комментарий