Волжск олан шыже-телылан кузе ямдылалтеш, калыкын илышыжым саемдаш манын, мом ышташ кӱлеш? Ты шотышто кугу мутланымаш Волжскысо краеведений тоштерыште лийын: Марий Эл вуйлатыше Александр Евстифеев совещанийым эртарен.
Вуйлатыше палемден, тений Волжск 50 гыч 100 тӱжем еҥ илыман изи ола-влаклан комфортный оласе средам ыштыме шотышто всероссийский проект конкурсышто сеҥышыш лектын. Ты проект оласе Тумер отым тӱзатымашке виктаралтын. Тидлан 80 миллион теҥге ойыралтеш.
Тыгак Волжскышто ечероллер трассым ышташ палемдыме. Кугорным чоҥымо, социальный объект ден коммунал сетьым уэмдыме пашамат вораҥдыман.
«Кызыт ме тоштерыште улына. Шукерте огыл тудым уэмден олмыктымо пашам мучашлыме. Экспонат-влакым вераҥдыман икмыняр залым ончал савырнашат лиеш. Тӱҥжо Кугу Отечественный сарын 75 ияш лӱмгечыжлан пӧлеклалтын. Тоштер оралте 1992 ий гыч республик кӱкшытан тӱвыра поянлык объектлан шотлалтеш. Сандене ме тудым шотышто кучаш полшашак тӱҥалына», — каласен А.Евстифеев.
Волжск оласе мэрын пашажым шуктышо Алексей Веселов Волжск оласе калыкын илыш условийыжым саемдаш полшышо обьект-влакым да социальный сферым шыже-теле пагытлан ямдылыме нерген ойлен. Паша палемдыме график почеш кая. Тӱвыра, образований, тазалыкым аралыме, социальный аралатмаш объект-влак 100 процентлан ямде улыт. Кызытеш шуко пачашан ныл пӧртым приниматлыме огыл: коктыштыжо шокшым шотлышо приборым монтироватлат, да коктыштыжо инженер сетьым олмыктат.
Регион вуйлатыше Волжск оласе корнылам олмыкташ финансированийым кугемдыме нерген каласен. Тидын дене пырля региональный корнылам олмыкташ федерал правительстве 399 миллион тенгем ойырымо нергенат ушештарен. А.Евстифеев оласе кучемлан подрядчик-влакын пашаштым контрольышто кучаш кӱштен.
Тыгак Волжскышто Ленин проспектым уэмден чоҥаш палемдалтын. Марий Эл Правительстве Председательын икымше алмаштышыже Михаил Васютин ты оласе «Родина» кинотеатрым уэмден олмыктымо паша план дене палдарен. «Тудат республик кӱкшытан тӱвыра поянлык объектлан шотлалтеш. Сандене обьектын историйлан шерге улмыжо тудын тӱжвал сыныштыжат палдырнышаш. Тудо 1951 гыч 1962 ий кокласе совет архитектурын виянжымыж
дене палдара. Тушто икмыняр тукымым шуарыме паша каен. Но жап эртыме семын оралте тоштемын, туге гынат тӱвыра поянлык объект улмо статусшым йомдарен огыл. Сандене республик вуйлатышын кӱштымыж почеш, «Марий Элын тӱвыраже» кугыжаныш программе кышкарыште тудым олмыкташ проектно-сметный документацийым ыштыме. Тушто ынде 100 икшывылан искусство школ лиеш. Сандене культурно-массовый мероприятийым эртараш 300 еҥлан залымат келыштарыман», — палдарен М.Васютин.
Российын Президентше РФ Федеральный Собранийлан посланийыштыже искуство школ-влакым вераҥдыме оралтылам олмыкташ кӱштен улмаш. Тидым шуктымо амал дене Российын тӱвыра министерствышкыже Марий Эллан федеральный бюждет гыч 10 искуство школым, тыгак ты кинотеатрын оралтыжымат уэмден олмыкташ субсидийым ойыраш йодын колтымо. Сандене кинотеатрын олоралтыштыже лишыл кок ийыште лач тыгай паша каяш тӱҥалеш.
Марий Эл Республик вуйлатышын Организаций да
аналитике виктемжын уверже негызеш
С.НОСОВА ямдылен
