САМЫРЫК ТУКЫМ

Воктенет – самырык еҥ: Шым семӱзгарын мастарже

Алексей ГОРИНОВ – Кужэҥер район Йырмарий ялын шочшыжо. Тудын дене ме июльышто Марисолаште, Марий самырык тукым слётышто, палыме лийынна. Рвезын уста да чолга койышыжо шинчалан вигак пернен. Тудо шке йырже ӱдыр-рвезе-влакым писын чумырен кертын. 

– Алексей, тый изинек тӱвыралан шӱман лийынат?

– Изи годсек музыкант лияш шоненам. Ойырен налме сомылем мылам моткоч келша. Палантай лӱмеш тӱвыра да сымыктыш колледжыште тунеммем годымак Шернур тӱвыра пӧртыштӧ практикым эртенам. Мыйым тушко аккомпаниаторлан ӱжыныт. Тыге ынде тушто 2013 ий гыч тыршем, но тӱналтыште ныл тылзе гына ыштен шуктенам. Вара мыйым армий радамыш налыныт.

– Службым эртымылан от ӧкынӧ?

Мый Свердловск областьыште ракетный войскаште служитленам. Тушто илышым вес семын ончалынам. Капкыл шотыштат пеҥгыдырак лийынам. Мыйын шонымаште, кажне рвезылан армийыш миен толман.

– Мутланымына годым икмыняр семӱзгар дене шоктен моштымет нерген ойлышыч…

Ссузышто баян дене шокташ тунемынам. Тыгак шӱвыр, шиялтыш, балалайке, фортепиано, тӱмыр, гармонь дене шоктен моштем. Икманаш, айдеме-оркестр улам (воштылеш – авт.). Тыгак слётышто шкешотан шӱвырым ышташ тунемынам. Тудым ямдылыме мастер-классым Алексей Ибулаев ончыктен. Тиде семӱзгар дене шоктенам гынат, тудым кузе ыштымым таче марте пален омыл. Садлан Васли Ольошлан шинчымашем пойдараш полшымыжлан кугу таум каласем. Кӧ пала, ала ончыкыжым тиде моштымаш пашаштем кӱлеш лиеш.

– Марий самырык тукым слётыш Российын тӱрлӧ кундемже гыч чолга марий ӱдыр-рвезе-влак чумыргат. Кажныже тушто шкаланже мом гынат налеш. А тыланет тушто лийме мом пуэн?

Тушто икымше гана лийынам. Мыйым чылажат ӧрыктарен да куандарен. Тыгак мыйым тӱвыра министрлан сайленыт. Кугу ответственностьым шижынам. Ӱдыр-рвезе-влаклан жапым оҥайын эртарышт манын, тӱрлӧ модышым, конкурсым шонен муынам, нуно тушко кумылын ушнышт манын тыршенам.

Жал, тыгай кӱлешан мероприятий тынар кӱчык жап шуйна. Тудо шукырак эрта гын, пайдаже утларак лиеш, шонем. Вес ийынат слётыш ушнаш кумыл уло, молан манаш гын ятыр пайдам налынам. Мутлан, марий тӱвыра, йӱла, калыкнан ожнысо илышыже, историйже нерген. Поснак историй науко доктор, профессор Валерий Степанович Патрушевын лекцийже оҥай лийын. Икманаш, слёт тӱвыранам, йылмынам, сымыктышнам, йӱланам арален кодымаште моткоч суапле пашам шукта. Слётышто вес кундемыште  илыше марий ӱдыр-рвезе-шамычын марий шӱлышышт утларак почылтеш. Марла мутланыдыме-влак шочмо йылмышт дене кутыраш тӱҥалыт. Сандене слёт кужу ӱмыран лийже манын тыланем.

Лидия ШАБДАРОВА.

М.Скобелевын фотожо.

Опубликовать в Одноклассники

Добавить комментарий