СПОРТ

Виян, таза лияш – чыла велым шуаралташ

Шукерте огыл «Марий Эл» ий полатын пресс-залыштыже спорт туризмым, ориентированийым вияҥден колтымо шотышто пресс-конференций эртен.

Тушко молодёжный политике, спорт да туризм министр Л.Батюкова, спортын ты видше дене кылдалтше, тренер-преподаватель, спортсмен, журналист-влак чумыргеныт.

Марий Элысе спорт туризм да спорт ориентирований федераций 2019 ийыште республикыште тӱнямбал первенствым эртарыме нерген увертарен. Организацийын еҥже А.Ложкинан палемдымыж почеш, тидын шотышто  правительствыште тореш огытыл. Тыгай таҥасымаш мыняр элым авалтымым шонен муаш лиеш… Тидыже, мутат уке, пытартыш ийлаште верысе турист-влакын сай результатышт, призёр радамыш логалмышт, сеҥымашышт дене кылдалтын.

Марий спортсмен-влак спортын ты видлаштыже пытартыш ийлаште чынжымак сеҥымашышт дене куандарат. Юл кундем федерал округышто гын, тыглай практик семын эрта, спорт мастер нормативымат шуктат. Мутлан, Марий Элысе спорт туризмын историйыштыже чылаже 44 спорт мастер шотлалтеш. Пытартыш 10 ийыште 25 еҥ ты кӱкшытыш шуын. Ты видым вияҥдымаште республик кӱкшытан «Роза ветров» ден Йошкар-Оласе «Азимут» йоча-юношеский рӱдер-влак шотлалтыт. 2017 ий деч вара –  «Виктория» спорт школ. Кундемым шотыш налын, республикыште вӱд, ече, пешеходный да велосипед туризм дене пеҥгыде кылым кучат. Федераций пелен тренер ушем пашам ышта. Тудым Россий сборныйын старший тренерже С.Фёдоров ден А.Алафузов вуйлатат.

Спорт туризм ден ориентированийын паша лектышышт грант денат кылдалтын. Мутлан, 2017 ийыште гражданский обществым вияҥдыме шотышто Россий президентын «Шке ориентиретым ойырен нал» проект 1,9 миллион теҥге грантым сеҥен налын. Тений – 1,4 миллион теҥгем («Турист палатке – мемнан кеҥеж пєртна»). Тений тыгак федераций Марий Эл правительствын «Тӱшка спорт» да «Эн кугу сеҥымашке шумо спорт» направлений дене 250 тӱжем теҥгеаш грантын озаже лийын.

– «Шке ориентиретым ойырен нал» проект республикнан 14 районыштыжо кок тылзе наре эртаралтын, – ойла А.Алафузов. – Тудо чынжымак оҥай лийын. Чылаже вич тӱжем утла тунемше ушнен. Южо вере тӱҥалтыште ӧрынрак

 тӱҥалыныт. Варажым тичмаш огыл командым лукмыштлан єкыненыт. Проектын эртаралтмыжым тӱнян кеч-могай лукшо гыч онлайн йӧн дене ончаш лийын. Вет ме тачысе кечылан келшыше оборудований дене пайдаланенна. Тыгайже тӱнямбал кӱкшытан чемпионатлаште кучылталтеш. Теве вес проект дене («Турист палатке – мемнан кеҥеж пӧртна»)  ме 38 палаткым да 200 еҥлан снаряженийым налынна. Тыге ме шкеак лектын, полевой йӧн дене таҥасымашым эртарен кертына.

Ешараш уто огыл: 23-25 ноябрьыште Кужэҥер посёлкысо кыдалаш школын спортзалыштыже спорт туризм дене таҥасымаш лиеш.

Е.Эшкинина.

Авторын фотожо.

    

 

 

 

 

Опубликовать в Одноклассники

Добавить комментарий