ПАТЫРЛЫК

Виян лийын кушкыт

Тиде мероприятийышке икмыняр район гыч кадет класслаште тунемше, юнармеец-влак лӱмынак толыныт. Эн шукыжо, манаш лиеш, Волжский район гыч ӱдыр-рвезе-влак лийыныт. Шарача кыдалаш школын «Шторм» командыжым (вуйлатышыже В.Иванов) поснак палемдыман. Июль мучаште тудо Волгоградыште юнармеец-шамычын военно-полевой сборыштышт  лийын.

– Военно-патриотический шӱлышан всероссийский мероприятийыште республикын чапшым кум кече аралыме, сай результатым ончыктымо, – палемдыш Виталий Егорович. – Ты ганат ӱдыр-влак рвезе-шамыч деч нимыняр почеш ышт код. Чыла шотыштат ойыртемалтыч. Тыгай сбор кап-кылым пеҥгыдемдаш, икте-весе коклаште икойыш шуаш, вашла умылаш, неле жапыште полшаш туныкта.

– Военно-полевой сборышто салтак илыш дене кылдалтше таҥасымаште вийым тергенна. Кӱчык да кужу дистанцийыш куржталынна, гранатым кышкенна, ӱдыр-влак отжиманийым ыштенна, а рвезе-шамыч турникыште шкеныштым нӧлтеныт, – шыргыжалын ойла отделенийын командирже Дарья Иванова. – Мыланем автоматым рончен погаш келша. Республикыште лӱйылтмӧ дене икымше верым налынам. Тушто ориентированият ӧрдыжеш кодын огыл. Мемнан команде кокымшо верым нале. Тыгай сборышто вес кундемысе ӱдыр-рвезе-влак дене палыме лияш, нунын койыш-шоктышыштым пален налаш оҥай. Тыге икте-весе коклаште кыл шочеш. Тидыже кызыт путырак кӱлешан, шонем.

Опубликовать в Одноклассники

Добавить комментарий