Латкок ияш эргымым шкетын ончем. Мыйын гай ача-ава-шамычлан июль гыч пособийым палемдаш тӱҥалыныт. Йодмашым мыят пуэнам, но выплатым тӱлаш тореш лийыныт. Молан?
Н.Михайлова
Йошкар-Ола
Йодышлан Россий Пенсий фондын Марий Элысе пӧлкажын пресс-службыштыжо тыге вашештеныт:
– Туге, Россий Правительствын 2021 ий 28 июньышто лукмо пунчалже дене келшышын, фондна 8 гыч 16 ияш марте икшывым шкетын ончен куштышо ача-ава-шамыч деч у пособийым палемдыме нерген йодмашым 1 июль гыч налаш тӱҥалын. Выплатым палемдыме але тудым тӱлаш тореш лийме нерген пунчалым лукмо деч ончыч ешын тӱнен илымыжым пеҥгыдемдыше комплексный акым эртарена. Тыгодым доход деч посна ешын погыжымат шотыш налына. Пособийым тӱлаш тореш лийме амал-влак кокла гыч кызытеш визытше эн тӱҥлан шотлалтеш:
1. Йодмашым пуышо аван (ачан) да ешысе моло еҥын доходышт тылзыште илен лекташ кӱлмӧ окса кугыт – 10184 теҥге – деч утларак.
(Тиде амал пособийым тӱлаш тӧреш лийме нерген пунчал-влак кокла гыч 58 процент ужашым айла.)
2. Ситыдыме документым палемдыме жапыште кондымо огыл.
(Йодмашым тӧрлаташ але ешартыш документым кондаш кӱлмӧ нерген уведомлений ача-ава-влакын Кугыжаныш услуго порталысе личный кабинетышкышт толеш. Сандене, чылажымат жапыштыже ыштен шукташ манын, личный профильыште уведомленийым чӱкташ кӱлеш. Йодмашысе йоҥылышым тӧрлаш вич паша кече пуалтеш.)
3. Ешын кок але тылеч утларак автотранспортшо уло.
(Пособийым тӱлаш тореш лийме нерген пунчалым лукташлан тидат – кумдан шарлыше амал.)
4. Чын але тичмаш огыл уверым пуымо.
(Йодмашым колтымо деч ончыч ача-ава-влаклан документыш пуртымо данный-шамычым тергаш темлалтеш.)
5. Икшывылан 17 ий темын.
(Палемдыме ийготан йоча-влаклан выплатым огыт тӱлӧ.)
Ушештарена: пособийым палемдышашлан ешын эртыше 12 тылзаш доходшо шотыш налалтеш, но тиде жап йодмашым пуымо деч 4 тылзе ончыч шотлалтеш. Мутлан, йодмашым 2021 ий июльышто пуымо гын, доход 2020 ий март гыч 2021 ий февраль марте шотыш налалтеш, августышто пуымо гын, – 2020 ий апрель гыч 2021 ий март йотке. Да эше – доход налогым кучымо марте шотыш налалтеш.
М.ИВАНОВА
