УВЕР ЙОГЫН

Вес жапыш кусареныт

2020 ийыште эртышаш калык перписьым адакат вес пагытыш кусареныт.

Коронавирус эпидемий калык перписьым эртарыме жапым ынде кумшо гана вес жапыш кусараш амалым ыштен. Ынде тудо 15 октябрь гыч 14 ноябрь гутлаште лиеш. Тидын нерген калык переписьлан ямдылалтме да тудым эртарен колтымо шотышто республиканский комиссийын черетан заседанийыштыже увертареныт. Тудым Марий Эл Правительстве председательын икымше алмаштышыже Михаил Васютин эртарен.

Россий Правительстве кӱкшыт гыч переписьым эртарыме шотышто вашталтышым пуртымеке, нормативно-правовой актлашкат вашталтышым пурташ да у планым ышташ кӱлын. Ты шотышто мемнан субъектыштат  переписьлан вуйын шогышо-шамыч пеш писын чыла кӱштымым шуктеныт. Маристат вуйлатышын пашажым жаплан шуктышо Инна Петрова ты пашам кузе ворандарыме дене палдарен. Федеральный кучем орган-влак регион-шамычын переписьлан ямде улмыштым аклаш лийше икмыняр критерийым палемденыт. Ты шотышто перепись мыняр илыме верым авалтышашым, адрес озанлыклаште ситыдымаш уло-укем, перепись эртараш ситыше да келшен толшо пӧлемым ямдылымым да ойпидышым ыштымым, транспорт ден связь лиймым ончылгоч рашемдат.

Маристатын данныйже почеш, республикысе чыла гаяк муниципал образованийлаште  переписьым эртараш палемдыме критерий почеш ямдылалт шуктеныт. Лач Юрино посёлкышто веле кызытеш тидлан Роспортебназдзорын йодмжым шукташ келшен толшо пӧлемым муын кертын огытыл. Но районысо администраций вуйлатыше-влак ты чырым лишыл кечылаштак кораҥдаш сӧреныт.  

Кузерак вара тений перепись эрташ тӱҥалеш? Республикыште илыше кажне еҥ тудым кугыжаныш услугым пуышо интернет сайтыште, стандартан пеҥгыдемдыме учётный записьше уло гын, шке гыч 15 октябрь гыч 8 ноябрь гутлаште эртен кертеш.  Интернет гоч йодыштмашым эртыше кажне участник переписчиклан ончыктышашлык шифран кодым налеш. Тыгак переписьым шуко функциян рӱдерышкат (МФЦ) миен эрташ лиеш. Тыгак переписчик-влак сурт, пачер едат кошташ тӱҥалыт.

 Моло перепись деч тенийсын эше ик ойыртемже лиеш: переписчик-влак планшет дене кошташ тӱҥалыт. Чыла данныйым электрон версийыш вераҥдат. Тидыже переписьым иктешлыме пашам куштылемдышаш. Кажне планшетым «Аврора» российысе операционный системе дене пойдареныт. Республикыш 1650 тыгай планшет толын. Лач тынар переписчик пашам ышташ тӱҥалеш. Тачысе кечылан нуно Йошкар-Олаште, Волжскышто, Медведево ден Советский районлаште эше огыт сите. Но ты шотышто паша ышталтеш. Ончыктен кодыман, перепись годым чыла данныйым йодыштмо еҥын ойлымыж гыч гына возен налыт. Ты але вес уверым пеҥгыдемдыше документ огеш кӱл. Переписчик-влакым ончылгоч туныкташ тӱҥалыт.

 Марий Эл Правительстве председательын икымше алмаштышыже заседанийым мучашлыме годым комиссийын еҥже-влаклан переписной персоналым ямдылен, туныктен шукташ, урем ден подьездлам волгалтараш, калыкыште умылтарымаш пашам эртараш кӱштен.

Переписьын ончылгоч ыштыме данныйже дене 2022 ий апрельыште палдарышаш улыт, а тӱрыс иктешлымашым 2022 ий мучаште ыштат.

 Марий Эл вуйлатышын организаций да аналитике  виктемыжын уверже негызеш С.Носова ямдылен. 

Опубликовать в Одноклассники

Добавить комментарий