Верысе «Боевое братство» пӧлкан вуйлатымыж почеш Афганистан гыч совет войскам лукмо, воин-интернационалист-влакым шарныме кечым да Отечествым аралыше-влакын кечыштлан пӧлеклалтше пайремым Кужэҥер районышто кумдан палемденыт.
Афган сарын ветеранже, «Боевое братство» да «Застава» мер организацийын еҥже-влак верысе конфликтлаште вуйым пыштыше воин-влакын памятникышт воктене погыненыт, йот мландыште ӱмыр лугыч лийше йолташыштым шарналтеныт. Митинг деч ончыч Кужэҥер тӱҥ школын кадетше-шамыч Кугу Отечечственный сар ийлаште вуйым пыштыше воин-земляк-влакын обелискышт воктек Чап гирляндым пыштеныт, сортам чӱктеныт. Боевой действийын ветеранже-влакым Кужэҥер район администрацийым вуйлатыше С.Михеев, Пограничник-влакын «Застава» мер организацийыштын Кужэҥер районысо пӧлкажым вуйлатыше В.Иванов, десантник В.Ершов, верысе КПРФ пӧлка гыч Л.Иванов саламленыт.
Школ спортзалыште кира спорт да армрестлинг дене таҥасымаш эртен. Тӱвыра пӧртыштӧ «Афганистаныште сарын ветеранже» шарнымаш медальым кучыктеныт, концертым ончыктеныт.
Афган сар пытымылан 29 ий эртен гынат, шучко жап калык шӱмеш эрелан кодын.
М.ИВАНОВА.
