28 июньышто Марий Эл вуйлатыше Александр Евстифеев Йошкар-Оласе аэропортыш миен да тудым угыч кунам почаш лиймым аклен.
Республик вуйлатыше вучымо залым, аван да икшывын пӧлемыштым, медпунктым, начар тазалыкан еҥ-влаклан санузелым ончен савырнен да пассажирын эртышаш корныж дене ошкылын. Тыгодым регистраций гыч тӱҥалын, чоҥешташ ямдылалтмешке эртышаш чыла службын пашаштым да пӧлем-влакым аклен. Шукерте огыл ремонтым ыштымеке, нӧлталтме-шичме полосан могай улмыжланат акым пуэн. Республикын правительстве председательжын икымше алмаштышыжын сомылжым жаплан шуктышо Александр Сальниковын ойлымыж почеш, аэропорт Росавиацийын тергымашыжым эртен да могай ситыдымашым палемденыт гын, чылажымат шотыш налын тӧрлатыме.
Марий Эл вуйлатыше вашке мемнан деке республикыш III Всероссийский кеҥеж спартакиадын участникше-влак толшаш улыт манын ушештарен, нуным аэропорт вашлийшаш манын каласен да волонтёр-шамычын дежурствыштым организоватлаш кӱштен.
Аэропортым ончен савырнымекше, Александр Евстифеев уэмден тӧрлатыме пашам сайын шуктымым, зданийым кӱлеш семын шотыш кондымым палемден да тӱҥжӧ – самолет-шамыч чоҥештылаш тӱҥалышт манын каласен.
— Кызыт ме республикым инвестицийым кучылташ йӧнаным ыштыме шотышто йодышым рашемдымын свидетельже улына. Турист-шамычын толмыштат мыланна моткочак кӱлешан. Но тӱҥжӧ – инвестор-шамычым шке велыш савырымаш. Кызыт ме нунылан каласен кертына: республикыш самолет-влак чоҥештылыт, — иктешлыме семын каласен Александр Евстифеев.
Тудо ешарен: республикын правительствыже аэропортым ончыкыжымат вияҥдаш палемда. Тыгак ончыкыжым могай направленийым почаш лиймымат каҥашыме нерген ойлен. Марий Эл вуйлатыше аэропортым самолет-влакын транзит остановкышт семын кучылтмо йодышым лончылаш темлен.
Александр Сальниковын ойлымыж почеш, 8 июльышто республикысе туроператор-влак «Руслайн» компанийын еҥышт дене вашлийыт. Тушто могай направлений дене чоҥештылаш кӱлмым каҥашат.
Л.Камалетдинова
