КУЛЬТУР ДА ИСКУССТВО

Беларусьышто шымакш нерген каласкален

10 гыч 12 октябрь марте Беларусь Республикысе Могилев олаште Беларусь ден Российын V форумышт эртен.

Тушко Марий Эл Республик гыч Россий калык усталыкын сулло коллективше, калык коллектив лӱмым нумалше мурышо да куштышо «Эрвел марий» ансамбль, Олык Ипай лӱмеш Кугыжаныш молодежь премийын лауреатше, мурызо Э.Токташева, Шернур посёлко гыч марий тӱр мастар Л.Веткина ден Волжск ола гыч курчак мастар А.Нурутдинова миеныт.

– Форумын кокымшо ден кумшо кечынже сымыктыш пайремыште Российысе ден Беларусьысо усталык коллектив-влак мастарлыкым ончыктеныт, кидмастар-шамычат шке пашаштым выставке-ярмиҥгаш луктыныт, — миен толмышт деч вара палемдыш «Эрвел марий» ансамбльын концертмейстерже Б.Дмитриев. — Мемнан ансамбль кок кече жапыште рӱдӧ площадьыште да «Руш» уремыште мурен-куштен. Чылаже ныл концерт программе дене калыкым куандарен.

Мемнан-влакын выставкыштышт Россий Федерацийын федерал погынымашыжын Федераций советшын председательже Валентина Матвиенко лийын. Тудлан марий кидмастар-шамычын пашаштат, «Эрвел марий» ансамбльын мурен-куштымашыштат  келшен.

Шернур кидмастар Лидия Веткинан ярмиҥгаш лукмо марий тӱран кажне арверже – шовычшо, шымакшыже, солыкшо, салфеткыже, пӧръеҥ да ӱдырамаш тувыржо – эртен кайыше-влакым сымыстарен.

-Тыглай гына огыл, южыжым савыркален-савыркален онченыт. Ӱдырамаш-влаклан поснак шымакшым ужаш да тудын нерген пален налаш оҥай лийын. Тудым кузе чийыме нерген умылтаренам веле огыл, ик ӱдырлан чиктен ончыктенам. Сӧрастарыме ӱзгар-влакат шукыштын шинчаштым йымыктарен, налынат каеныт, — каласкала Лидия Васильевна. —  Унаште калык шокшын вашлийын. Жапше годым Россий гыч Беларусьыш илаш мийыше-влакат шукын толыныт. Мемнан дене родо семын мутланат, ӧндалыт, эсогыл шинчавӱдымат луктыныт. Олаште утларакше изирак пӧрт-влак улыт, уремыште ару, чатка. 

Лидия Веткинан йырже мастер-классышкат шукын чумыргеныт. Тудо кажне кумылан еҥым тореш кашта йӧн дене тӱрлаш туныктен. 

— Пайремыште лийме, тусо калыкын поро улмыжо, унам вашлийын моштымыжо кужу жаплан шарнаш кодеш, — маныт Марий Эл гыч мийыше-влак.

А.Байкова. 

 

Опубликовать в Одноклассники

Добавить комментарий