Уремыште май. Йырваш пӱртӱс одарлана, ош ломбо тамле пушыжым йырваш шара. Школ ончылно ош фартукан ӱдыр-влак, йӱксыла ийын, вальсым пӧрдыт. Рвезе-шамычат мотор костюмым чиеныт. Тиде кечын нунылан «пытартыш йыҥгыр» йоҥга.
Марий Элыште тений 11-ше классым 2910, а 9-ше классым 6384 еҥ тунем пытара. Икымшышт парт коклашке пытартыш гана шинчыт гын, весыштлан корным ойыраш логалеш: школыштак кодаш але ссузыш каяш.
Ты куанле да тунамак шӱлыкан пайрем республикыште 23-25 майыште эртен. Выпускник-влаклан туныктышышт, ача-аваштат ятыр сугынь мутым ойленыт. Ӱдыр-рвезе-шамычат нунылан тауштеныт, почеламутым, мурым, ятыр поро шомакым пӧлекленыт. Теве Советский район Кельмаксола кыдалаш школышто 8 тунемшылан вашке школ дене чеверласышт логалеш.
11 ий жапыште туныктышо-влак йочалан кокымшо ача-ава лийын шуктеныт, школат кокымшо суртыш савырнен, садлан тудым коден кайыме годым чонышто эреак шӱлык кумыл шочеш. Лач 1-ше классыште тунемше-влакын пӧлеклыме мурышт шыргыжалаш таратен. Нуным саламлаш Кужмарий ял шотан илем администрацийым вуйлатыше И.Янцев, Советский районысо ялозанлык управленийым вуйлатыше И.Комаров миеныт. Иван Аркадьевич ГТО-н шӧртньӧ значокшым икмыняр выпускниклан кучыктен.
Алевтина ХАЛТУРИНА, школ директор: «Тений 11-ше классым 8 еҥ, а 9-ше классым 12 ӱдыр-рвезе тунем пытара. Мутат уке, шӱлык кумыл шижалтеш, туге гынат илыш ончыко кая. Выпускникна-влаклан экзаменым сайын кучаш да шонымо кӱкшытышкышт шуаш тыланена».
Надежда КИНДУЛКИНА, выпускник-влакын класс вуйлатышышт: «Вашкен школысо игем-влак оралтынам коден каят, сандене чонем вургыжеш. Нунын дене ойгыжымат, куанжымат пырля пайленна. Классна кугу огыл гынат, келшен, умылен, ваш полшен иленна. Шым рвезе кокла гыч визытынже военный академийыш пурынешт. Шонымашышт шукталтше манын тыланем, тыгак ЕГЭ-мат чыланат сайын кучышт, илыш корнышт куштылго лийже».
Дмитрий ЗАГАЙНОВ, 11-ше классын тунемшыже: «Таче иканаште куаным да тургыжланымым шижам. Эн ончыч экзаменым сайын кучынем, вет мый Санкт-Петербургысо А.Можайский лӱмеш военно-космический академийыш тунемаш пурынем. Ме ик класс гыч нылытын тушко кайынена. Тыгак ик рвезе Санкт-Петербургысо Н.Кузнецов лӱмеш военно-морской академийыш пурынеже».
Л.ШАБДАРОВА.
М.Скобелевын фотожо.
