Кужэҥер район Купсола ял уремыште шошо толмым чылажат шижтара: канде каваште шемгорак-влакын йӱкышт шокта, корнышто лум писынрак шула, лакылаште вӱд погына, кечыйол шошо вӱдыштӧ “модеш”, шинчам йымыктара.
Шемгорак-шамыч шошо игечым пеленышт эн ончыч конденыт, сандене кугешнен каркалат. Тошто арамаште пыжашышт коеш. Ял мучаште, кӱвар воктене, лавыра палдырна. Йоча-влак корем вӱдым ончаш лектыныт, йӱкышт умбаке шергылтеш. Нуно велосипед оравашт дене лавырам келыт.
Нольо эҥер «помыжалтын», ий деч утлен, вӱдшӧ писын-писын ончыко йога. А курыквуй гыч эшеат мотор сӱрет почылтеш, кундемын сылнылыкшым ончен, шерет ок тем. Теве шинчамлан памаш перныш. Корнем тушко такыртышым. Памашым печен налме, левашым нӧлтымӧ. Лум ӱмбач ошкыльым гынат, ыжым волалт. Шӱргем яндар вӱдеш шӱялтен, верысе кидмастар Н.Бирюков деке ошкыльым. Тудо уремыштак ала-мом ыштылеш ыле.
Николай Валерьевич тиде ялыштак шочын-кушкын. Школым тунем пытарымеке, Йошкар-Оласе строительный техникумым, вара Политехнический институтым тунем пытарен. Геодезист, инженер-строитель, «СМУ-2» ООО-што мастерлан пашам ыштен.
— 2010 ийыште пашадарым начар тӱленыт, сандене шочмо ялышкем пӧртылынам, кидпашам ыштен илаш тӱҥальым. «Ӧрдыж гыч ончен, нимом ышташ от тунем», — тыге илымыж годым кочам Николай Андреевич каласен коден. Эре шке кид дене ыштыман, тунам гына чыла сомылжат ворана, — манеш Николай Бирюков.
— Кызыт ямде пашам лак дене чиялтем. Калыклан окна рамымат ыштем. Теве Йӱледӱр селасе памаш пелен йӱштылаш шкешотан волакым ыштенам. Нольо эҥер пелен памашым тӱзатынем. Беседкым, теҥгылым шындынем. Тыгак тушто кӱвар оҥам вашталтыман, — шонымашыжым почын пуыш Николай.
М.СКОБЕЛЕВ.
Авторын фотожо.
Снимкыште: Н.Бирюков
