Рушарнян, 13 августышто, У Торъял районысо «Первый Май» озанлыкын Чӱксоласе стадионжо йӱк-йӱан дене темын ыле. Физкультурникын кечыже лӱмеш ты кечын тыште мини-футбол дене открытый кеҥеж кубок эртаралте. Тудо спортын ветеранже, районышто «У ял» икымше футбол командым чумырышо Г.А.Васильевын шочмыжлан 110 ий теммылан пӧлеклалтын ыле.
Таҥасымашын тӱҥ организаторжо эргыже, Владимир Григорьевич Васильев, ыле. Тудо ӱмыржӧ мучко ветеринарлан ыштен гынат, спортлан ачаж гаяк моткоч шӱман айдеме.
Рушарнян игече моткочак сай ыле – кӱшыч кече шыргыже, а тиде жапыштак тӱҥалтыште юалгырак, вараже леве мардеж пуыш, сандене ты кечын стадионыш шагал огыл калык погынен. Иктышт ончаш, весышт футболла модаш толыныт. А таҥасымашке ушнаш шонышо-влак ятырынак лийыныт. Нуно У Торъял район гыч веле огыл, пошкудо Советский район гычат толыныт. Чылаже 12 команде вий ден мастарлыкшым тергыш.
Таҥасымашым эртарыме дене погынышо-влакым Чӱксола ял шотан илем администраций вуйлатыше А.Ермаков, «Первый Май» озанлык вуйлатыше А.Новиков саламлышт да чылаштлан сеҥымашым тыланышт.
Тылеч вара икымше модмашлан тӱҥалтышым Григорий Андреевич Васильевын уныкажын 6 ияш эргыже … Григорий Андреевич Васильев, тупыштыжо ялт кугезе кочажын гаяк шкенжын лӱмжым возыман йошкар футболкым чиен, ыштыш — лач тудланак мечым чумалаш ӱшанышт. Да тугай тале таҥасымаш тӱҥале! Ик футбол пасушто, коклаштышт верым коден, иканаште ныл команде модыч. А нунын коклаште улшо ты верыштыже меат, кумылан-влак, таҥасымаш жапыштак, мечым чумен, чоннам изи йочала куандарен кертна. Погынышо-влак кудо модмашыжым ончашат ӧрыныт. Санденак шукынжо кажне гана иканаште коктым эскераш тыршышт. А ончашыже кужун перныш – таҥасымаш эрдене 10 шагат лишан тӱҥале да кастене 17 шагат деч варарак веле пытыш.
Оҥай ыле, мутлан, Григорий Андреевичын уныкаже-влакын посна чумырымо командыштын модмыштым ончаш. Содыки нуно шкеныштын веле огыл, чапланыше кочаштын чапше верчат таҥасеныт. Футболлан тӱҥалтышым пыштыше еҥлан намысшак лийын огыл – иктешлымаш почеш уныкаже-шамычын командышт кокымшо верыш лекте. Финалыште нуно «У Торъял» команде дене модыч. А пелефиналышкыже тыгак эше «Первый Май» ден Тошто Торъялын командышт лектыныт ыле.
Икымше верым «У Торъял» команде сеҥен нале. Таҥасымашын тӱҥ жапыштыже модмаш ничья дене пытыш гынат, п Пенальтим чумымо гына сеҥышым рашемдаш полшыш. Тыге 5:4 счет дене нуно шканышт сеҥымашым «кондышт». А командышкыже футболын ветеранже, моло талын модшо-влак чумыргеныт ыле.
Эн сай вратарьлан жюри «Первый Май» командын вратарьже Игорь Смирновым шотлыш. «Эн сай модшо» лӱм дене «У Торъял» команде гыч Алексей Речкин палемдалте.
Тыгак кок кубокым кучыктышт. Васильевын кубокшымат, район кубокшымат «У Торъял» командылан пуышт. Икманаш, тиде кечын пиал ты командылан поснак чот шыргыже.
Любовь Камалетдинова.
