Российын Общественный палатыже элыштына ача капиталым пурташ темлен.
639 тӱжемат 400 теҥге кугытан «Федеральный многодетный (отцовский) капитал» манмым пурташ темлымашым Россий Общественный палатын демографий шотышто комиссий председательже Сергей Рыбальченко ыштен.
Тудо тиде кугыт оксам ешыште кум але утларак икшыве шочмо годым тӱлаш темлен. Тыгак общественник-шамыч кумшо да утларак йоча шочмылан еш-влаклан, нунын парышыштым ончыде, икшыве-шамычын кум ийым темымешкышт элнан чыла регионыштыжо оксам тӱлаш темлымаш дене лектыныт. Эше шуко шочшан ешыште нунын ийготыш шумешкышт тылзе еда 2500 теҥгем тӱлаш ойым ыштеныт. Нунын темлымышт почешак вич шочшан еш ик погыжлан (мланде участкылан, пӧртлан, дачылан, автомобильлан але вес транспорт средствылан) налогым йӧршеш тӱлышаш огыл. Тыгак шуко шочшан ешла гыч икшыве-влаклан кӱшыл профессиональный шинчымашым яра да целевой контракт йӧн дене пуаш, икмыняр моло ойымат ыштеныт.
Тиде темлымашым сайлан шотлат да илышыш пурташ пунчалым луктыт але уке – илена да ужына. Пуртат гын, шуко еш окса шотышто шагалрак тургыжланаш тӱналеш ыле, очыни…
Л.КАМАЛЕТДИНОВА
