АКЦИЙ КОНКУРСЫ

«Армийыш» путёвко

Рушарнян Подмосковьесе «Патриот» паркыште «Армий-2020» тӱнямбал военно-технический форум да армийыште служитлыше-влакын «АрМИ-2020» тӱнямбал модмашышт почылтын. Мланде мучко пандемий эше озалана гынат, россий обороно промышленностьын сеҥымашыжым ончаш 90 утла кугыжаныш гыч делегаций-влак толыныт. Такшым, тачысе сюжет тидын нерген веле огыл. Коронавируслан кӧра чаракым кораҥдыме деч вара тиде  икымше командировко.

Корнысо этюд-влак

Свежа эр мардеж чурийым шыма-ан ниялта… «Боингын» лыжган волымыжым шке шинча денак канен ончет. Мотор. Тиде вудака яндауан изи залет огыл. Чебоксарысе аэропортын кугу огыл пӧлемже-влак пассажир-шамычым ынде самолётын чоҥештен кӱзымӧ да волымо верышкыжак луктын. Тидлан кӧра корныш тарваныме татым вучымо жапат тунар ок шижалт, мӧҥгешла, оҥай веле.

Самолётышто калык тич. Пуйто чыланат «помыжалтыныт», эсогыл акымат шотыш огыт нал, а вет тудыжо ӱмашсе кеҥежымсе деч палынак шергештын. Шоҥгыжат, самырыкшат  чыланат икгайла веле койыт, ошалге-канде маскышт гына волгалтеш. Эсогыл чуваш ГТРК гыч коллеге-влакымат вигак пален налаш ок лий. Нуно мемнан команде семынак март гыч таче икымше гана регион деч ӧрдыжкӧ лектыныт.

Внуково. Тудо шӱлыкан да пуста. Ончычсо семын огеш «шол». Мемнан самолётым тӱҥ линий деч ӧрдыжыш шогалтышт, мо шарнем,  тыгайже икымше гана. Тӱнямбал перевозко укелан кӧра. (Ончыкырак каен ойлаш гын, палемдем: пандемийлан кӧра аэропорт кӧргыштат ак ойыртемалтше. Мутлан, «Му-Му»-што ик кӱмыж теҥгечысе борщ 180 теҥгеаш, а ӱмаште 250 теҥгем луктын пыштыман ыле.) Автобусыштыжо эше ик куан  – корнылан нигӧлан тӱлаш, рашрак ойлаш гын, водительлан «наличный» манме оксам налаш ок лий, а мыйын транспорт картычкемын срокшо эртен, садлан метро марте «мераҥ» семын кудалаш логале.

 

Covid-19 деч эрыкан кумдык!

«Армий-2020» форумын тӱҥ ӱжмашыже тений лач тыгай лийын. Лач пандемийлан кӧра тудым да армийыште улшо-влакын модмашыштым ик жапыште эртараш логалеш. Адакшым мероприятийлаш пурышо кажне еҥын капкыл температуржым висат, тыгак шкендын уке гын, маскым пуат (эх, а мыйже тудым мӧҥгӧ гычак шапашлен конденам). Волонтёр-влакын ӱмбалнышт кум пачашан аралтыш: вошткойшо шлем, маске да пластик авыртыш. Форумысо выставке павильонлашке вераҥдыме спиртан санитайзер шотышто, наверне, рекорд марте шумо, но, чынжым гын, спиртше мемнан гай огыл, ӱпшыжӧ йӧршынак ыш шижалт. Туге гынат чыла тиде профилактике пашам йот элла гыч толшо участник-влак акленыт, шонем.

Мут толмашеш, уна да участник-влак – тиде 92 эл гыч толшо-влак, нунын тӱрлӧ военный формыштым да маскыштым йӧратен ончен шогышым.

«Армий-2020» форумын икымше пленарный заседанийышкыже Михаил Мишустин ден Сергей Шойгум вучышна. Тидын деч ончыч Россий Федераций Обороно министерствын пресс-службыж деч съёмкым ышташ кеч ик картычкым пуаш сӧрвалышна, но, чаманаш логалеш, огешат кӱл улмаш: эрдене чыланат арам тургыжланенна, ВИП уна-влак толынат огытыл, сандене залыште чон канен пашам ыштенна, тыгодым погынышо-влак коклаште палыме да кумдан чапланыше чурий-шамычым кычалынна.

 

Икымше гана икымше дене

Россий Федераций Обороно министерствын пресс-рӱдерже, паледа, кушто верланен? Армийысе семынак кугу палаткыште, тыштак – кафе (конешне, тушто чылажат оксала), шондан, пресс-рум да эсогыл тамакым шупшмо вер. Пытартышыжым форумым да модмашлам эртарыме кумдыкышто ышташ ок лий, но возышо-влаклан исключенийым ыштеныт. Вӱдан кулерат моткоч кӱлешан лие – шокшо игечылан кӧра тудо ик мероприятий ден весе коклаште  каныш годым журналист-влакын йӧратыме верышкышт савырныш. Конешне, тӱҥжӧ нунын кокла гыч – форумым торжественно почмаш. Но тушкыжо логалаш вес паша: тыглайже нелат огыл, но кузе – умылаш ок лий, молан манаш гын начальникше-влак, манмыла, теҥыз наре улыт, кӧ нунын коклаште эн тӱҥжӧ  – иктат ок шинче.

Паледа, йочасадысе семын мужыр дене шукертсек коштыктен огытыл. Мыйын мужырем – МЭТР-ын операторжо Коля Казаков, шеҥгелнына – редактор Виталик Рыжков. Мемнам лӱмынак монтироватлыме платформыш вӱден наҥгайышт. Ала-мом тугайым, ӧрыктарышым вучышыла, Коля дене коктын йокрокланаш тӱҥална, «Икымше канал» гыч коллеге-влакым ужмешке. Дмитрий Зайцев операторжо дене пырля форумым торжественно почмым ончыктышо фотограф ден оператор-шамыч нерген вставкым ямдыленыт. Кум дубльым ыштышт. Мемнан дене пырля трибуно кас выпускыш логале – тиде куандара. Эх. тольык маске дене мемнан вигак пален налашыжат ок лий…

 

Российыш пагален ӱжына

Россий Федераций Правительстве председатель Михаил Мишустин ден тиде кугу военный событийын организаторжо, Обороно министр Сергей Шойгу, форумым почмо лишан толын шуыч. Военный ансамбльын Армийысе модмаш-влакын гимныштым йоҥгалтарымыж деч вара элнан президентше Владимир Путинын видеообращенийже лие. Тудо форумым да модмаш-влакым тынысым да икте-весым умылымашым пеҥгыдемдыме йӧн манын.

Михаил Мишустинын палемдымыж почеш, таче «Армий» моткоч чапле выставке площадке статус марте шуын. «Российыш пагален ӱжына», – йот эл гыч уна-влакым саламлымыж годым тудо манын да россий военный-влакын ончылнышт шогышо задаче-влакым палемден: чыла тӱрлӧ войскаште мемнан элыште ыштен лукмо связь системе, робототехнический комплекс, программно-аппаратный средства лийшаш. Войзымемла, тудым колыштшемла, теве молан ӧрымак: Россий Федераций Правительстве председатель ик ганат тезислаш ыш ончал, теве могай уш! Но вара гына, «плёнкым проявитлымеке», суфлёрын яндау кок пластиныжым ужын колтышым. Техникына теве кушко шуын!

 

Эн шерыже – мучашлан

Форумышто Марий Элын вич предприятийже – Марий машиностроительный завод, Волжскысо электромеханический завод, «Ната-Инфо» ден «Технотех» компаний-влак, тыгак «Юлтех» – шке вий-куатшым ончыктен. Нунын выставке площадкыштышт Марий Элым вуйлатыше Александр Евстифеев лийын, но тидын нерген газетын кушкыжмысо номерыштыже палдарыме.

Чумыр налмаште ончерыште чылаже 28 тӱжем утла экспонат да шӱдӧ единице боевой технике лийын. Поснак «Танкпромлан 100 ий» экспозицийым палемдыман. Площадкыште мемнан элыште ыштен лукмо гусеницан боевой машина-влак – 1920 ийла тӱҥалтышсе куштылго МС-1 танк гыч тӱҥалын, ик эн кызытсе образец марте. Тачысе жапын ик эн-энже – Т-90М да Т-80БВМ танк-шамычын модификацийышт. А мыйын эн йӧратыме экспонатем – Т-34-85, кокымшо тӱнямбал сарын эн сай танкше. Лач тудын дене гына мый шкежат войзалтым, содыки тудо – Кугу Сеҥымашын боевой машинаже. Эше ик оҥай – Россий Федераций Обороно министерстве выставкыште войскаште ыштыше священик-влакын формыштымат ончыктен: парадыш чийымымат, сӧй пасуш лекшашымат.

Кочкаш йӧршым мороженыйым гына муым, тыгак кок капучином. Корныш лекме деч ончыч мо улшыж дене серлагаш логале. Конешне, армийысе пучымышым кочмо шуын, но полевой кухньын кечыже арня кыдалне гына лийын, а мыланна кастене мӧҥгышкына чоҥештыман. Жал, вет эше шуко мом ончымо шуын. Кеч сар дене кылдалтшым пешыже ом йӧрате гынат, но, чынжымак, чыла тидым шке шинча дене ужмо да кучен ончымыжак – нимо деч шерге.

Денис Речкин

Йошкар-Ола – Москва – Кубинка.

Г.КОЖЕВНИКОВА ямдылен

 

Вставка:

«Армий» Тӱнямбал военно-технический форум тӱнясе выставке площадке-влак кокла гыч ик эн кугулан шотлалтеш. Тушто Россий вооруженийын, военный да специальный техникын тачысе жапын ик эн чапле образец-влак ончыкталтыт. Форумышто эл-влак кокласе военно-технический кылым пеҥгыдемдыме шотышто йодышым каҥашат. Тенийысе мероприятийын тӱҥ программыже «Патриот» Конгресс-ончер рӱдерыште, Кубинка аэродромышто, «Алабино» полигонышто да Комсомолький ерыште эрта.

«Армий-2020» форум 29 август марте шуйна. Кумылан-влак «Патриот» паркыш, Кубинка аэродромыш да «Алабино» полигоныш миен толын кертыт.

     

    

Опубликовать в Одноклассники

Добавить комментарий