КУЛЬТУР ДА ИСКУССТВО ЭСТРАДЕ

Армийыште гитарым шокташ тунемын

Лаштыкнан тачысе унаже – мурызо, бард,  вокал да семӱзгарым шоктышо, «Шуматкече» ансамбльын солистше Валерий Петров.

Валерий Морко районысо Курыкйымал ялеш шочын-кушкын. Тудо эстраде аланыште калыклан шукертак палыме. Пытартыш жапыште тудо Йошкар-Оласе кугу сценыште шагалрак коеш, маныт газетнам лудшо-влак. Кызыт тудо кушто ила да могай пашам ышта? Нине да моло йодышлан шкеж дене мутланымеке пален налына.

 Валерий, эстраде аланыште калыклан шукертак палыме улат? А икымше гана сценыш лекме эреак шарналтеш докан?

— Икымше гана сценыш 1990-ше ийлаште лектынам. Коркатово культур пӧртыштӧ концертыш ӱжыныт ыле. Тушто «Ломбо» мурым йоҥгалтаренам. Икымше мурсаска кызытат чӱчкыдын ушыш толын пура, но сценыште мурымаш уке.

— Репертуарыштет мыняр муро уло?

— «Лийнем пеленет», «Эн лишылем-влаклан», «Салам, авай» да молат. Чылажге иктаж 25 муро погына докан. Тиддеч посна эше «Шуматкече», «Куан памаш» ансамбль-влакын репертуарышт изижак огытыл.

Шукышт изишт годым тӱрлӧ семӱзгарым шокташ тунемыт. А Те кунамрак, гитарым кидыш налын, шокташ тӱҥалында?

— Армийыште служитлымем годым. Службым Забайкальеште, пограничник войскаште, эртенам. Тунамсе пагытым кызыт порын шарнаш веле кодеш. Армий тӱням вес шинча дене ончалаш, илышым умылаш веле огыл туныктен, семӱзгарланат лач туштак шӱмаҥынам. Кас еда, йолташ-влак дене чумырген, гитарым темдыштынна, мурым тунемынна. Тидак, очыни, армий гыч пӧртылмеке, Республикысе тӱвыра да сымыктыш колледжын хор-дирижёр пӧлкашкыже тунемаш пураш таратен.

— Колледж деч вара паша верым муаш неле лийын?

— Пытартыш курсышто практикыш колтеныт. Мый Коркатово культур пӧртыш миенам. Тунамак «Шуматкече» ансамбльын вуйлатышыже чолга марий Евгений Соколов коллективыш мураш ӱжын. Келшенам. А вара ик жап гыч Йошкар-Олаш кусненам да Эшпай лӱмеш Марий кугыжаныш филармонийыш пашаш пуренам. Лу ий Искандаров лӱмеш капеллыште муренам.

Тынар жап Йошкар-Олаште илымеке, пашам ыштымеке, ялыш каяш мо таратен?

— Чонем шочмо кундемышкак ӱжын. Калыкыште манмыла, унаште сай, а мӧҥгыштӧ — эшеат сайрак. Ялыш пӧртылмеке, уэш «Шуматкече» ансамбльыш ушненам. Кызыт Коркатово тӱвыра пӧртыштӧ художественный вуйлатышылан ыштем. Культур пӧрт пелен «Шуматкече», «Куан памаш» ансамбль-влак улыт. Кокымшыжым икмыняр ий ончыч шкеак чумыренам. Кызыт коллективыште визытын улына. Концерт дене республик мучко коштына, ӧрдыж кундемлашкат лектына.

Тений «Шуматкече» ансамбльлан — 30 ий. Лӱмгечыжым кузе палемдаш шонеда?

— Шыжым Йошкар-Олаште, Ленин лӱмеш тӱвыра полатыште, кугу концертым эртараш шонена. Чаманен каласыман, вуйлатышына Евгений Соколовын ош тӱня гыч кайымекыже коллективнам нигӧ ок вуйлате. Туге-гынат икте-весе дене иза-шольо семын лийынна, икте-весылан кеч-кунамат полшена, келшен илена.

Кодшо тылзын «Какшан сер ӱмбалне» авторский муро фестивальыште те гран-прим сеҥен налында. Тушко ушнаш кӧ темлен?

— Ончыч Валерий Кульшетов финн-угор бард-влаклан «Югорно» фестивальым эртара ыле. Тушко мыят ятыр гана миенам. А тиде гана увертарымашым газетыште ужынам да мастарлыкем терген ончаш шоненам. Тушто «Тау, тылат», «Шочмо вер» муро-влакым йоҥгалтаренам. Калык шокшын вашлийын. А кунам тӱҥ призым — гитарым — сеҥен налмым увертарышт, моткоч йывыртенам ыле.

А тыйын гитаретше улыс. Тудым вашталташ шоненат мо?

—  Сӱретчылан тӱрлӧ тӱсан чия, кистычке эреак кӱлешан улыт, музыкантланат семӱзгар нигунам уто огыл. У гитарым кидыш налмеке, вигак шоктен ончышым. У  — тудо уак! (воштылеш). Тудын дене шукерте огыл Пермь кундемысе Кудымкар олаште эртыше фестивальыш миен толаш пиал шыргыжале. Тушко бард Геннадий Григорьев дене когыньнам «Кугарня» газетын редакторжо шкежак намиен коштыктен. Адакшым нунын конкурсыштын условийжак тыгай лийын: конкурсышто гран-прим налшым тусо фестивальыш наҥгаяш. Пермь мландыште кок фестивальыште — «Чудь кар» ден «Ловлӧн бикыв» — мастарлыкым ончыктенна. Марий мурым тусо калык шокшын вашлийын, тауштен.

— Тӱрлӧ фестиваль, конкурс Тыланда мом пуа?

— У вашлиймашым. Тыгак йолташ-влак дене ужын мутланаш амалым да муро аланыште, музык тӱняште у йолташым муаш йӧным ыштат.

Пытартыш жапыште республикыштына вокал да семӱзгар ансамбль-влак шагалемыт. Тидын шотышто мом ойлен кертыда?

— ВИА-влак кодшо курымысо 90-шо ийлаште шуко лийыныт. Тунам кажне тӱвыра пӧрт пелен вокал да семӱзгар ансамбль пашам ыштен. Чын, тыгайышт шагалемыныт. Очыни, семӱзгар-влакым налме шотышто нелылык уло.

Алевтина Байкова мутланен

Э.Иманаевын фотожо

Опубликовать в Одноклассники

Добавить комментарий