УВЕР ЙОГЫН

Арбор гыч стюардессе Елена

Марий Турек район Арбор кундем Чоманэҥер ялыште шочын кушшо тиде марий ӱдырын сылнылыкшым шукертсек ончен коштам. Инстаграммыште шындылме фотолажым ужын, ялт модель гай коеш манын эскерем. «Тудын нерген газетыш возаш гын, сай ыле» шонен, Еленалан сералтышым. Ялыште ӱдырым кучаш ок лий – эрыкан кайык гае эре «чоҥештылеш». Инстаграмм гочак йодышем-влакым пуэдышым. Пеш поро кумылан, мутланаш йӧратыше ӱдыр мылам тыманмеш вашештыш.

Школ деч вара Елена Марий кугыжаныш университетын тӱнямбал кыл факультетышкыже тунемаш пурен. Аваже «Кӱшыл школыш тунемаш пурен от керт гын, поварлан кает» каласен улмаш. «Но мылам тиде профессий келшен огыл», – ойла тудо.

Тунемме жапыштак Елена кок кеҥеж поездыште проводницылан пашам ыштен. «А стюардессе лияшыже кузе шонен пыштенат?» йодышемлан тудо тыге вашештыш:

–  Мый корным моткоч йӧратем. Изинек ковам ден пырля Татарстан республик, Киров область да моло вере пырля «шӱдырналт» коштынам. Поездыште пашам ыштымем годым тӱрлӧ олалам ужынам. Тунамак шонымаш лектын: самолет денат чоҥешташ ыле! Но кертам мо? Интернетыште авиакомпанийла нерген возымым лудын иктышкыже резюмем колтенам да вашмутым изин кугун вученам. Кунам собеседованийыш ӱжыныт, тунар куаненам, эсогыл йолташ ӱдырем-влак ден  казапача гай тӧрштылынам.

Тыге тудо икымше гана шкетын Москваш лектын кая. Офисыште  кӱкшӧ капан, мотор, тудын семынак паша веран лияш шонен толшо влакым ужын, чылт ӧрмалга.Тудлан икмыняр йодышым вес йылме дене пуат. Лена англичан, француз йылмыла дене вашешта. «Шагал йодыштыч, мыйым огыт кодо дыр», – шоналта. Ятыр еҥ гыч нылытым гына ойырен налыныт, нунын коклаште мемнан Еленат лийын.

Ынде вич ий утла ӱдыр тӱрлӧ элыш самолёт дене чоҥештылеш. Мутшо почеш,тиде жап ик рейс гае эртен каен.

– Шуко вере лийынам, кажне вер-шӧрын шке сӧраллыкше, ойыртемже уло. Но мылам шочмо Арбор кундемем эн шерге да мотор. Тушто мыйым йӧратат, эре вучат, – ойла стюардессе.

«Мый автомашина дене кудалме годымат ноем, а самолёт… Нелын да лӱдыкшын ок чуч?» йодмемлан тыгай вашмут лие:

 – Космонавт-влакын тазалыкыштым кузе тергат – мемнанымат тыгак. Чоҥештылаш ом лӱд, мом ужаш пӱрен, тудо садак лиеш. Пассажир-влак самолётышто улшо пашаеҥлан «Могай калык гыч улат?» йодышым пуаш йӧратат. Мыйым япон, суас, казах ӱдыр да монь манын шонат. «Марий улам» манмешкем марте иктат тогдаен огыл. «Марий Элже Российыште мо?» – вара йодыт…
      Каласыман, Елена «Вайлдбериз» вургемым ужалыше  компанийлан войзалтеш. «Модельжылан параметрем кугурак», – каласыш.
       – Шагат пояс-влак тӱнямбалне ойыртемалтыт. Южгунам кече ден йӱдым путает. Отельыште помыжалтам да, «Кушто улам? Мыняр шагат каненам? Йӱд але эр?» туштен кием. Организмлан пеш неле. Жаплан тунем веле шуат, мӧҥгеш Москваш чоҥештыман. Вара тушто гына сайын каналтем.
         Марий ӱдыр Елена Семёнова верч чон куана да кугешна. Тек мемнан стюардессын кажне рейсше кава гаяк волгыдо лиеш!

Анна Алыкечева

Опубликовать в Одноклассники

Добавить комментарий