Марий Элын Тазалыкым аралыме министерствыжын 24 сентябрьыште увертарымыж почеш, пытартыш суткаште республикысе инфекционный стационарла гыч 38 пациентым мӧҥгӧ колтымо, тыгодымак 45 черлым эмлалташ пыштыме. Тыге, теҥгече эрдене регионын 7 эмлымверыштыже чылаже 410 еҥ киен. Ты чот гыч 406 черлылан «пневмоний» диагнозым шындыме, 118 пациентын у коронавирус инфекций дене черланымыжым пеҥгыдемдыме. 113 еҥ неле состоянийыште лийын, 6 черле шодым искусственно вентилироватлыме йӧн дене шӱлен, 172 пациент – кислород полшымо дене.
«Коронавирус: статистика» сайтын 24 сентябрьысе данныйже почеш, пытартыш суткаште Марий Элыште у коронавирус инфекций дене черланыме 22 у случайым регистрироватлыме. Тиде чот ынде 4720 случай марте шуын. Пандемий пагытыште COVID-19 инфекций деч чылаже 49 еҥ колен.
М.ИВАНОВА
