ЭКОЛОГИЙ

Аралалтеш, тугеже воктеныже пале лиеш 

Кугыжаныш шулдыр йымаке налме пӱртӱс кумдык-влак пелен тидын нерген увертарыше пале-влакым верандыме паша умбакыже шуйна.

Тидлан Марий Элын Пӱртус поянлык, экологий да йырым-йырысе средам аралыме шотышто министерстве вуйын шога. Мутлан, кодшо ийын гына республикысе бюджет кӱшеш тыгай увертарыше щит ден аншлаг-влакым Килемар районысо «Кумъяр», «Лужъер» ерла, Юрино районысо «Шидыяр», «Подвесное», «Козиково» купла, Килемарысе «Сибирьысе лыстан пӱнчӧ», Волжский районышто шукерте огыл ыштыме «Сотнур кӱкшака» заказникла воктене вераҥдыме.

Кодшо ийын тыгак Звенигово районышто «Таир»,  Медведево районысо Шинчалан ерла, Килемар районысо «Тогашевский» заказник воктене пале- влакым олмыктымо.

Каласен кодыман: тыгай пале-влак ты але вес верыште кугыжаныш аралыме пӱртӱс кумдыкла улмо нерген веле огыл шижтарат, тыгак тушто улшо ойыртемалтше поянлыкым арален кодаш полшат. Тидыже шкаланат кӱлеш да, РФ Президентын указше дене келшышын, илышыш шыҥдарыме «Экологий» национальный проект денат келшен толеш.

 С.НОСОВА

Опубликовать в Одноклассники

Добавить комментарий