2021-2025 ийлаште илышыш пурташ палемдыме «Марий Эл Республикыште здравоохраненийын первичный звеножым модернизоватлымаш» регионысо программе тений идалык тӱҥалтыш гыч пашам ышташ тӱҥалын. Тудын лачшымак кузе шукталт толмыж нерген тазалыкым аралыме министрын алмаштышыже А.Ушакова (снимкыште) дене мутланена.
– Илыш ончыкта: у коронавирус инфекцийын пандемийже палемдыме шуко пашалан чаракым ышта. Туге гынат, республикысе тазалыкым аралыме системын первичный звеножо кызытсе жаплан келшышын уэмдалтынак толеш, модернизаций тичмаш куат дене шыҥдаралтеш, манаш лиеш. Тендам, Ангелина Ивановна, тиде куандара?
– Россий Федераций Тазалыкым аралыме министерствын увержым иктешлаш гын, Марий Эл программыште палемдыме мероприятий-шамычын контрактацийышт шотышто элнан регионжо-влак коклаште кандашымше верым налеш, Юл кундем федеральный округышто – кокымшым. Тиде пеш сай результат. 2021 ийыште куд объектым капитально олмыктымо нерген контрактым ыштыме, таче кечылан визытыштыже: Волжск оласе рӱдӧ больницыште, Курык марий районысо Виловат участковый эмлымверыште, Шернур районысо рӱдӧ больницыште да Советский районысо рӱдӧ больницын Солнечный врачебный амбулаторийыштыже, – паша уже шукталтеш. Кудымшо объект – Морко районысо рӱдӧ больницын поликлиникыже – шотышто аукцион эртен, 21,8 млн. теҥгеаш контрактым лишыл кечылаште ыштена.
– Медицине организаций-влакым капитально олмыктымо деч посна эше чоҥашат палемдыме ыле… Ты шотышто иктаж паша шукталтеш мо?
– «Марий Эл Республикыште здравоохраненийын первичный звеножым модернизоватлымаш» регионысо программым илышыш пуртымо кышкарыште тений Волжский районысо Учимсола ялыште фельдшер-акушер пунктым чоҥаш палемдыме. Тудым уже нӧлтен шуктымо. ФАП икымше пациентше-влакым шыжым вашлиеш. А 2025 ий марте тазалыкым аралыме эше куд у объектым: Марий Турек районысо Тат-Китне ялыште фельдшер-акушер пунктым, Йошкар-Оласе Индешымше микрорайонышто йоча поликлиникым, Юрино посёлкышто поликлиникым, Звенигово ден Медведево районлаште кум врачебный амбулаторийым, – чоҥаш палемдыме.
– Программе кышкарыште регионысо поликлиникылашке транспортым кондаш тӱҥалме. Могай пашалан?
– Туге. Техникым медик-влакым пациент-шамычын мӧҥгышкышт кондыштараш, черле ден тӱрлӧ биологический материалым медицине организацийлашке наҥгаяш, эм ден медицине пашаште кӱлшӧ изделийым шупшыкташ да администрацийын задачыж дене кылдалтдыме моло пашам шукташ ойырымо. 2021 ийыште здравоохраненийын первичный звеножлан 59 единице автотранспортым налаш палемдыме, таче кечылан чумыржо 40,5 млн. теҥге суммылан 46 автотехникым кондашлан аукционым эртарыме да контрактым ыштыме. Республикнан районлашкыже 24 машина уже толын.
Тылеч посна 2020 ий декабрьыште тиде программе кышкарыштак Марий Элыш 13 машинам ончылгоч кондымо. Нуным, медицине организаций-шамычын подразделенийыштын чотыштым шотыш налын, врачебный амбулаторийлашке да участковый больницылашке шеледыме. Чыла тидым ялыште илыше калыклан медицине полышым лишемдыме шот дене ыштыме. Мут толмашеш, 2025 ий марте республикышкына чылаже 83 автомобильым кондаш палемдыме.
– Тымарте кондымо медицине оборудований кокла гыч кудыжым поснак палемдымыда шуэш?
– 2021 ийыште чумыржо 206,8 млн. теҥге суммылан 15 единице оборудованийым кондашлан контрактым ыштыме. Кугурак ужаш – 11 единице – медицине организацийлашке уже толын. Тиде – маммограф, флюорограф, ультрайӱкан визуализацийын универсальный системыже-шамыч да моло оборудований.
Йошкар-Оласе 1-ше №-ан медико-санитарный частьлан компьютер томографым налме шотышто торгым эртарыме. Тиде республикыштына томографан икымше поликлинике лиеш. Тудын полшымыж дене кызытсе жаплан келшыше амбулаторный рентгенологический рӱдерым ышташ йӧн лектеш. Компьютер томографым шындаш келшыше верым ямдылашлан республикын бюджетше гыч 7 млн. теҥгем ойырымо. Проект ямде, олмыктымо пашам шуктышо организацийым ойырен налме. Компьютер томографым кондымо жаплан поликлиникыште кӱлешан чыла пашам мучашлат манын ӱшанем. 2021 ийлан палемдыме мероприятий-влакым шукташлан чыла аукционым август кыдал марте эртарыме. Тыгодым конкурент процедурын результатше почеш оксам аныклен коден кертме, тудым медицине организаций-шамычлан программын мероприятийже-влакым илышыш пуртымо пашаште кучылташ разрешитлыме. Тыге, «Марий Эл Республикыште здравоохраненийын первичный звеножым модернизоватлымаш» регионысо программыш 18,2 млн. теҥге анык оксам шеледыме шотышто вашталтышым пуртымо. Тудо эше 16 единице медицине оборудований ден кок автомашинам налаш йӧным ышта. Программын проектшым Россий Федераций Тазалыкым аралыме министерствыш пеҥгыдемдаш колтымо.
М.ИВАНОВА
