15 гыч 18 апрель марте Йошкар-Олаште «Театральное Поволжье» проект почеш йоча театр коллектив-влаклан «Театральная юность» фестиваль эртен.
Ныл кече жапыште Йошкар-Ола, Козьмодемьянск, Волжск, Киров олала, У Торъял, Марий Турек, Медведево, Морко, Кужэҥер, Оршанке районла гыч ӱдыр-рвезе-влак Марий самырык театрын сценыштыже мастарлыкым ончыктеныт.
— Фестиваль кодшо курымын 70-ше ийлаштыже эртаралташ тӱҥалын. Ий гыч ийыш самырык артист-влакын мастарлыкышт кушмо шижалтеш, — ойла республикысе калык усталык да тӱвыра ден каныме паша шотышто шанче-методике рӱдер вуйлатыше Тамара Дмитриева. — Кажне коллектив ойыртемалтше пашам луктын. Самырык артист-влак рольым модмышт, образыш келгын пурымышт дене куандареныт.
Фестиваль жапыште чылаже 13 спектакльыште 300 утла йоча модын. Тушечын кокытшо – марла. Тидын шотышто Марий самырык театрын художественный вуйлатышыже, фестивальын жюрижын председательже Олег Иркабаев тургыжланен палемдыш:
— Сценыш марий спектакльым лукшо кажне гана шагалемеш. Ты гана Йошкар-Ола гыч «Воштончыш» образцовый музыкально-драматический театр ден Морко районысо Коркатово тӱвыра пӧрт пеленысе «Изи шӱдыр» театр кружок марий постановкым ончыктышт. Вес фестивальлан тыгайышт шукырак лийыт манын ӱшанен кодам. Адакшым марла модшо-влакым посна кумылаҥдыман докан. Туге гынат фестиваль шонымашкыже шуын, вет йоча да театр коллектив-влак вуйлатыше-шамычлан вашлиймаш, мастер-класс-влак эртеныт, поснак спектакльлам лончылымо чылаштлан пайдале лийын, шонем.
Гран-прим Козьмодемьянск оласе А.Эшпай лӱмеш искусство школын «СемьЯ» театр-студийже налын. Ты коллектив «Неужели нет меня» спектакльым ончыктен.
— Фестивальын тӱҥ призшым налаш — моткоч кугу куан, ӱшаныме гаят огеш чуч, — палемда театр-студийым вуйлатыше Ирина Глушкова да куан шичавӱдшым ӱштылеш. — Фестивальыш кажне гана толаш тыршена, вет тудо у ошкылым ышташ кумылаҥда. Шкенан дене спектакльым ончымеке, чыла сайын чучеш, а кунам тыште идалык ыштыме пашалан жюри акым пуа — тидыжак моткоч пайдале. Тыгайже йоча-влакланат пеш кӱлешан.
Сеҥыше-влакым икмыняр номинацийыште палемденыт.
«Образцовый театр коллектив-влак»:
— I вер – «Карнавал», (Марий Турек район);
«Драматический, музыкально-драматический театр-влак»:
I вер – «Оберег» калык театр-студий (Волжск ола);
II вер – «Дебют» образцовый театр студий (Медведево район);
– «Воштончыш» образцовый музыкально-драматический театр (Йошкар-Ола);
III вер – «Спутник» марий самырык образцовый театр (Оршанке посёлко);
«Эн сай ӱдырамаш роль» – Дарья Кузьминых («Спутник» марий самырык образцовый театр, Оршанке посёлко);
«Эн сай пӧръеҥ роль» — Евгений Иванов, Дмитрий Майоров, Андрей Пугачев, Александр Якимычев («СемьЯ» театр-студий, Козьмодемьянск ола);
«Кокымшо планан эн сай ӱдырамаш роль» – Дарья Кудрявцева («Дебют» образцовый театр студий, Медведево район)
«Кокымшо планан эн сай пӧръеҥ роль» – Иван Еропов («Дебют» образцовый театр студий, Медведево район);
«Эн сай актёр дуэт» – Анастасия Коршунова ден Даниил Агафонов («Оберег» калык театр-студий, Волжск ола);
«Эн сай режиссур», «Эн сай сценографий» – Татьяна Слаутина («Оберег» калык театр-студий, Волжск ола);
«Музык дене эн сайын сӧрастарымылан» – «Воштончыш» образцовый музыкально-драматический театр (Йошкар-Ола);
«СемьЯ» театр-студий Юл кундем федеральный округын «Театральное Поволжье» фестивальыштыже республикын чапшым аралаш тӱҥалеш.
Алевтина Байкова
М.Скобелевын фотожо.