Ӱмаште 21 сентябрьыште Марий Элын илышыштыже ик эн кугу событий лийын – Александр Евстифеевын республик вуйлатышын должностьышкыжо шогалмыжлан пӧлеклалтше мероприятий эртен.
Инаугурацийыште у вуйлатыше калыклан, Россий Федерацийын да Марий Эл Республикын Коституцийыштлан ӱшанлын служитлаш, нуным аралаш, пагалаш, айдемын да гражданинын праваштым да эрыкыштым оролаш, Марий Эл Республик вуйлатыше улмо кӱкшӧ обязанностьым шот дене шукташ товатлыш.
Тидлан лач ик ий эртен. Ты жапыште республикыштына мо ышталтын? Могай вашталтыш лийын? «Савырнен» ончалаш гын, ятыр паша ышталтын, шуко вашталтыш лийын. Республикыште илыше-влак ужыт: у вуйлатыше илышын тӱҥ шӧрынжӧ-влаклан эн кугу тӱткышым ойыра. Тудо инаугурацийын торжественный ужашыже мучашлалтмекак журналист-влакын «у вуйлатыше семын икымше ошкылда могай лиеш?» йодмыштлан тыге вашештен ыле:
— Мыйын тиде икымше ошкыл огыл, а умбакыже шуйнышо… Республикын парымже, йочасадлаште вер ситыдыме, моло нергенат шарнена. Але марте кузе ойленам, кызытат тидымак каласем: чылаштым пашам пырля ышташ ӱжам.
Нине ой-влакым вуйлатышын шуктымыжым ужына. Чынжымак, йочасадлаште верым ситарышашлан идалык жапыште икмыняр у садик чоҥалтыч, икмыняр вере группо-влак почылтыч. Корным ачалыме да уым ыштыме пашаланат оксам муашак тыршыме шижалтеш. Школ-влакымат уэмден тӧрлатат, уат нӧлталтеш. Маристатын данныйже почеш, республикыштына пашадар ӱмашсе дене таҥастарымаште кушкын. Тиде, чыным ойлаш гын, чылаштынак огеш шижалт. Но ончыкыжымат пашадар кушкаш тӱҥалеш моткочак ӱшанена. Ыштышаш моло паша, рашемдышаш тӱрлӧ пӱсӧ йодыш эше ятыр. Вуйлатыше республикыште илыше калыкын илышыжым саемдаш сӧрен гын, тугеже ончыкыжымат сӧрымыжым шукта, шона. Вет але марте мутшым ик ганат арам кышкылтын огыл…
Любовь Камалетдинова.
