УВЕР ЙОГЫН

Акым волтымо

Марий Элым вуйлатыше Александр Евстифеевын кӱштымыж почеш, калык дечын шӱкым погымо услугылан тарифым волтымо шотышто йодышым ончымо да тыгай пунчалым лукмо: 2020 ий 1 январь гыч «Благоустройство» региональный операторын обслуживатлыме икымше зонышто (Юл эҥерын шола серыштыже) илыше-влаклан тудым 9 процентлан иземдаш. Тидын дене келшышын, тений гыч пеҥгыде коммунал шӱкшакым погымо услугылан тариф 74 теҥгеат 83 ыр лийын. 2019 ийыште тиде услугылан 82 теҥгеат 73 ырым налыныт.

Ушештарыме семын: икымше зоныш Волжский, Звенигово, Килемар, Кужэҥер, Марий Турек, Медведево, Морко, У Торъял, Оршанке, Параньга, Шернур, Советский, Юрино район-влак пурат, кокымшыш – Козьмодемьянск ола ден Курыкмарий район.

Пеҥгыде коммунал шӱкшакым погымо да пытарыме реформо Российыште 2019 ийыште вийым налын. Тудо отрасльым вошткойшым ышташ, санкционироватлыдыме свалке-влакым пытараш да кокымшо ресурсым лийме семын шукырак переработатлаш палемдалтын.

М.ИВАНОВА

Опубликовать в Одноклассники

Добавить комментарий