«Айык Россий» федеральный проект элнан 85 субъектше кокла гыч кажныжым аракам йӱмӧ ваштареш эртарыме паша шотышто эксперт да аналитик семын ынде визымше ий шымлен. Тиде пашам теният регион-влакын айык лийме рейтингышт дене иктешлен.
Проектым вуйлатыше , РФ Общественный палатын еҥже Султан Хамзаевын мутшо почеш, рейтинг калыклан, кугыжаныш ден верысе кучем-влаклан аракам йӱмӧ кугытым да тудын зиянжым ончыктымо шот дене ямдылалтеш. Тудо тыгак РФ президент В.Путинын майысе указше-влак шукталтмым эскерыше мер механизмлан, РФ субъект-влакын «Здравоохранений» ден «Демографий» национальный проектлан цельышт ден задачыштым шуктен толмыштым аклыше виян инструментлан шотлалтеш.
Тыге, 2019 ийыште эн йӱшӧ регион-влак радамыш Приморский край, Чукотка да Ненец автономный округ-влак лектыныт. Эн шагал йӱшӧ региона-влак радамыш – ӱмашсе семынак Чечня, Ингушетий да Дагестан.
Марий Эл тиде спискыште 53-шо верыш логалын, пошкудо Татарстан – 23-шо верыш, Чуваший – 38-ше верыш, Нижегородский область – 56-шо верыш, Киров область – 77-ше верыш.
Рейтингын негызшылан алкоголь дене аярген колымо, алкоголизм дене орланыме, йӱшывуя ыштыме преступлений чотым да алкоголян продукцийым ужалыме кугытым налме. Тылеч посна эксперт-влак этил спиртым закондымын ямдылыме да ужалыме, регионысо арака ваштареш лукмо законын ойыртемжым шотыш налыныт.
М.ИВАНОВА