6 октябрьыште Марий Элысе писатель-влак ушем Марий Эл Республикын Тӱвыра, печать да калык паша шотышто министерствыже дене пырля «Сылнымут шыже–2021» семинар-совещанийым эртара.
Семинарыште самырык писатель, сылнымут ушемлашке да усталык кружоклашке коштшо ӱдыр-рвезе-влак чумыргат. Нунын возымо пашаштым икмыняр секцийыште лӱмлӧ литератор, Россий писатель-влак ушемын йыжынъеҥже-влак лончылаш тӱҥалыт. Нунын темлыме эн сай произведений-влакым «Дружба» да «Эрвий» альманахлаште, «Ончыко», «У сем», «Кече/Солнышко» журналлаште савыктат.
– «Сылнымут шыже» возкалаш йӧратыше самырык-влакым сылнымут паша деке лишемда, нунын мастарлыкыштым умбакыже вияҥдаш, тӱҥалше автор ден лӱмлӧ серызе-влак коклаште кылым ышташ полша. Тыгай семинар-совещаний кок ийлан ик гана эртаралтеш, – ойла Марий Элысе писатель-влак ушемым вуйлатыше Светлана Архипова. Тудым снимкыште ужыда.
Семинарыш ушнаш шонышо-влак, шкендан возымо сылнымут пашадам (марлат, рушлат) mailto:keche1@mail.ru электрон почтыш колтыза. Але Йошкар-Ола, Красноармейский урем, 44-ше пӧрт адрес дене «Россий писатель-влак ушем» мер организацийын марий пӧлкашкыже намиен кертыда. Йодыш-влакым рашемдышаш телефон номер:+79024302208 (Светлана Дмитриевна Архипова).
Л.СЕМЕНОВА
