Йошкар-Ола да Марий митрополит Иоаннлан 60 ий темын. Москон да Уло Русьын патриархше Кирилл тудым лӱмгече дене саламлен да II степенян святой благоверный Даниил Московскийын орденже дене палемден.
Митрополитын шкенжын ойлымыжо почеш, тыге патриарх Марий кундемыште 25 ий жапыште шуко черке чоҥалтмым палемден. «Тиде орден дене тӱҥ шотышто чоҥымо пашаште ойыртемалтыше-влак палемдалтыт. Патриархын мыйым тыге палемдыме увержымат родо-тукым-влак ойленыт», — каласыш митрополит шукерте огыл журналист-влаклан эртарыме Рошто приемышто. Нуно владыкам шочмо кече дене саламленыт, шуко поро шомакым ойленыт, тауштеныт да пӧлек шотеш епархийын «Мироносицкий вестник» журналжын комжо семын сылнештарыме тортым пӧлекленыт.
«Марий епархийым вуйлаташ колтымо годым юмын полшымо дене ик-кок черкым нӧлтен кертам гынат, пеш сай лиеш ыле, шоненам. Но тиде 25 ий пагытыште икмыняр у черкым чоҥаш, тоштым уэмдаш полшышо еҥ-влакым юмо колтенак, йӧным ыштенак шоген. Лач тудын полышыжо да юмылан ӱшаныше-влакын тыршымышт дене епархийнан илышыже вораҥын, тӱзланен толын», — палемден митрополит. Ик гана мутланымаштат тудо ойлен ыле: «Кажне черке шочшем гай…»
Тений Йошкар-Оласе да Марий епархийлан 25 ий темеш. Тудым вуйлатыше митрополит 70 ийыш тошкалын гынат, кажне кечын пашаште, еҥ-влак коклаште. «Рошто пайрем кечылаште эре гаяк мӧҥгыш пелйӱд лишан гына толалтын», — каласыш тудо. Теве приемым эртарыме кечын гын тудо мемнан деке Аза пӧрт гыч тольо. А шочмыж кечын да ошыгечынже Йошкар-Оласе Благовещений кафедральный соборышто кугу кумалтышым эртарен. Тушко пошкудо епархийла гыч архипастырь, епархийысе приходла гыч священнослужитель-влак толыныт ыле.
Саламлымаш деч вара митрополит мирополийын кызытсе илышыже дене палдарыш. Владыка Иоанн (Иван Иванович Тимофеев) 1958 ий 20 январьыште Озаҥ олаште кресаньык ешеш шочын. Кыдалаш школ деч вара Псково-Печерский монастырьыш послушник семын каен. «Самырык, вӱр модмо годым тӱрло послушанийым шукташ куштылгыжак лийын огыл», — палемден тудо. Но монастрьыште илыме жапым тудо кажне гана моткоч кугу кумыл дене шарналта да шуко оҥай историйым каласкала. Поснак тушто вашлийме илалше монах-влакым порын шарналта. Очыни, санденак тудо шкежат тыглай айдемын илышыж деч кораҥын да монахын корныжым ойырен налын.
1978 ийыште Иоанн Москосо духовный семинарийыш тунемаш пурен, а вара — Москосо духовный академийыш. Тунамак богословий кандидатын ученый степеньжым налын. Академийым пытарымеке, тудым Казанский епархийыш колтеныт. 1989 ий 23 апрельыште монах лияш шонымашыже шукталтын. Ӱпшым пӱчкыныт да иеромонах саныште Казанский епархиальный управленийын секретарьжылан шогалтеныт. 1991 ийыште игуменын санжым пуэныт, а 1993 ий июньышто — архимандритыным.
1993 ий 25 июльышто Марий Элыште посна у епархий ышталтын. Москон да Уло Русьын патриархше Алексий тудлан марий епархийым епископ саныште вуйлаташ ӱшанен. Лач тунам марий епархийын у историйже тӱҥалын. 2004 ийыште Иоаннлан архиепископ саным пуэныт.
А кодшо ийын октябрьыште епархий негызеш Марий митрополийым ыштеныт да тудым кок епархийлан шелыныт. Тудым Иоаннлан вуйлаташ ӱшаненыт. Шкенжымат ноябрьыште Моско кремльын Успенский соборыштыжо митрополит саныш пуртеныт.Тачысе кечылан мемнан митрополиийыште 100 приход, 2 монастырь, 100 наре храм уло. Тушто 140 наре священнослужитель пашам ышта.
Митрополит Иоанн икмыняр гана черкын да кугыжанышын кӱкшӧ наградышт дене палемдалтын. Нунын коклаште II степенян преподобный Сергий Радонежскийын, II степенян святитель Иннокентийын, II степенян «За заслуги перед Марий Эл» орденже-влак улыт.
Тыглай илышыште митрополит Иоанн пеш кумылзак, поро, весым колышт налын, поро каҥашым пуэн, мыскарам ыштен моштышо айдеме. Таклан огыл тудын деке лӱмын вашлияш, каҥаш ден благословенийым налаш толшо-влак эре ситышын улыт. Чынжымак, митрополит дене мутланымеке, тугай чон ласкалыкым налат… Журналист-влак ты гана тӱҥ шотышто икшыве-влакым кузе ончен куштымо, еш кокласе кылым саемдыме, ешыште ӱдырамаш могай лийшаш, тӱрлӧ чер, ойго годым шкем кузе кучаш кӱлмӧ нерген йодыштыныт.
Вашлиймашым мучашлыме годым владыка шке тыланымашыжым луктын ойлыш. «Те эре шарнышаш улыда: кажне шомакдан вийже кугу. Сандене те моткоч корректный лийшаш улыда. Кагазыш чыла язык, чоншижмаш нергенжак возаш ок лий. Тиде лудшым языкан корнышкат шогалаш кумылаҥден кертеш». Илышыште вашкыде, шоналтен-вискален налын, чыла пашам икшырымын шуктен, юмын пуымо поянлыклан куанен, йырымваш порылыкым шарен илаш тыланыш.
Светлана Носова.
Фотом митрополиийын пресс-службыж деч налме.
