Марий Элын Рӱдӧ сайлымаш комиссийжын данныйже почеш, кокымшо кечын, 18 сентябрьыште, 20 шагат жаплан республикыште чылаже 27,25 % йӱклен. Вес семынже тиде – 144730 еҥ.
Эн кугу чолгалыкым адакат Шернур районышто илыше-влакак ончыктеныт. Тушто 44,01 % калык сайлымашке миен. Кокымшо верыштат уэш Килемар районак: 42,51 %. А Йошкар-Олаште чылаже 23,61 % калык кокымшо кечын йӱклымашке ушнен.
Кушто, могай участкыште лачшымак мынярын йӱклымым ончалаш гын, мутлан, Советский районысо Кукмарийыште верланыше 499-ше участкыште кок кече жапыште 160 еҥ шке гражданский порысшым шуктен. У Торъял поселкышто улшо 413-шо %-ан участкыш 589 избиратель гыч кок кече жапыште 216 еҥ миен. Тидыже 36,7 % лиеш.
Кок кече жапыште Марий Элын ЦИК-ышкыже 28 вуйшиймаш пурен. 13 шотышто тергымаш кая. Тышеч агитаций дене кылдалтше вуйшиймашыжым Роскомнадзорыш колтеныт. 15 вуйшиймаш пеҥгыдемдалтын огыл.
Кӧн итаж-могай йодышыжо лектеш гын, Марий Элын Рӱдӧ сайлымаш комиссийышкыже «шокшо линийыш» йыҥгыртен кертеш. Тудын телефон номерже тыгай: 8 (8362) 240-220.
Л.Камалетдинова
