16 майыште эртыше «Президентский состязаний» таҥасымаште икымше верым Волжский районысо Сотнур команде налын.
Тушто республикнан тўрлӧ районжо гыч ты гана 18 команде вийжым терген. Участник-влак вич видыште таҥасеныт. Кажныже шке школын, районын чапшым арален. Тений ты модмаште шымше классыште (ўмаште кандашымше) тунемше-влак командым чумыреныт. Молгунамсе семынак моткоч тале таҥасымаш эртен, чылан тыршеныт.
Ончыко лекшылан – Анапыш путёвко. Талын таҥасымаште икымше верыш Волжский районысо Сотнур кыдалаш школын командыже лектын. Палдарен кодаш уто огыл: икмыняр ий почела ты район гычак Пӧтъял кыдалаш школын командыже икымше лийын (тренерышт А.Семёнов ыле), Шем теҥыз воктене всероссийский президент состязанийыште республикын чапшым арален. Йоча-влакат тўрлӧ видыште сай кўкшытым ончыктеныт. А Сотнур школын командыже (тренерышт Р.Михайлов) «Президентский модмаш» таҥасымаште икымше верыш икмыняр ий почела лектын. Тудо республикын чапшым ик гана веле огыл всероссийский модмаште, Орлёнокышто, арален, начар огыл результатым ончыктен.
– Шымше классыште тунемше кандаш ўдыр-рвезе спортын куд видыштыже вийжым терген. Станислав Петровым поснак палемдыме шуэш. Стас, 307 очком поген, абсолютный чемпион лийын. Вер гыч кужытыш тӧрштымаште, 60 метр кужытым куржмаште ойыртемалтын. Ӱдыр-шамыч коклаште Валерия Кузьминам мокталтыман, – мане Сотнур командын тренерже О.Иванов. – Шыжым Анапыште всероссийский состязанийыште вийыштым тергаш ямдылалтыт.
Ӱдыр-рвезе-влакым образований да науко министр Н.Адамова, Спорт министрын сомылжым жаплан шуктышо А.Гребнев саламленыт. Сайын тунем пытараш да кеҥеж каныш жапыште физкультур ден спортым мондаш огыл манын тыланеныт.
Сеҥыше да призёр радамыш логалше команде-влакым кубок да медаль дене палемденыт.
Ялысе школ-влак коклаште тыгай иктешлымаш:
Вер Команде Очко
- Сотнур кыдалаш школ (Волжский район) 1589
- Волаксола кыдалаш школ (Морко район) 1437
- Кугу Пумарий кыдалаш школ (Параньга район) 1411
- Тошто Торъял кыдалаш школ (У Торъял район) 1371
- Руш Шой кыдалаш школ (Кужэҥер район) 1247
- Марисола кыдалаш школ (Шернур район) 1231
- Ӱшнур кыдалаш школ (Советский район) 1225
- Кужмарий кыдалаш школ (Звенигово район) 1205
- Косолоп кыдалаш школ (Марий Турек район) 1141
- Семёновка селасе кыдалаш школ 897
- Шойбулак кыдалаш школ (Медведево район) 869
Ола ден селаласе школ команде-влак:
Вер Команде Очко
- А.С.Пушкин лўмеш кыдалаш школ (Волжск) 2656
- Советский посёлкысо 3-шо №-ан кыдалаш школ 2203
- 14-ше №-ан гимназий (Йошкар-Ола) 2140
- Звенигово оласе лицей 1999
- Кужэҥер посёлкысо 2-шо №-ан кыдалаш школ 1976
- Н.А.Заболоцкий лўмеш 2-шо №-ан кыдалаш школ (Шернур посёлко) 1796
- Килемар посёлкысо кыдалаш школ 1503
Е.Эшкинина.
Снимкылаште: сеҥыше Сотнур кыдалаш школын командыже.
