Марий Элыште утларак ямде режимым 16 август марте шуйымо.
Таче, 24 июльышто, Марий Элым вуйлатыше Александр Евстифеев 2020 ий 17 мартыште лукмо «У коронавирус инфекций (COVID-19) шарлымылан кӧра Марий Элыште калыклан сай санитарно-эпидемиологический илышым ыштыме мере-влак нерген» указышкыже вашталтышым пуртен. У коронавирус инфекцийын шарлымыж дене кылдалтше санитарно-эпидемиологический обстановкым шотыш налын, Марий Элыште утларак ямде улмо режимым 16 август марте шуен.
Тыгак шӱлымӧ корным аралыме средстве – маске да респиратор – дене пайдаланыме порядкым рашемдыме. Ынде нуным зданийыште, оралтыште, тӱшка транспортышто, кӱртньыгорно транспорт инфраструктур объектлаште, пассажир ден багажым заказ почеш шупшыктышо легковой таксиште, транспорт средствыште обязательно чийыман. Тылеч посна тудын дене уремыштат чыла еҥлан пайдаланаш темлалтеш.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
