Йошкар-Оласе Машиностроитель-влак уремыште верланыше ик йоча учрежденийыште пашам ыштыше-влак 1 май эрдене коляскыште шинчыше изи ӱдырым ужыныт. Тудо чот кырен пытарыме лийын.
Тидын нерген увертарымеке, полицийын следственно-оперативный группыжо тыманмеш ты верыш миен. Ты факт шотышто РФ Следствий комитетын Йошкар-Оласе следствий отделже уголовный делам тарватен.
Идалыкат пелаш изи ӱдыр чот сусыргышо лийын, сандене тудым республикысе йоча эмлымверын реанимацийышкыже вераҥденыт.
Уголовный розыск пашаеҥ-влак икшывын аважым кычал муыныт. Тиде Йошкар-Олаште илыше 28 ияш ӱдырамаш улмаш. Рашемдыме почеш, тудо ӱдыржым кырен, вара йоча учреждений воктене коляскыште шынден коден.
Кызыт тиде ӱдырамашым кученыт. Полиций пашаеҥ-влак мо кузе лиймым рашемдат.
Л.Камалетдинова.
