УВЕР ЙОГЫН

Кок еҥым кученыт

 Аварий лийме факт шотышто кок уголовный делам тарватыме. Кызыт нуным иктыш ушымо: илышлан да тазалыклан лӱдыкшыдымылык йодмашлан келшен толдымо услугым пуымаш, тыгак корно движений правил-влакым пудыртымаш да тугай транспорт средствам кучылтмаш, кудыштыжо шекланен шуктыдымылан кӧра кок але шукырак еҥ колен. Шымлымашым Россий Следствий комитетын Марий Элысе следствий управленийже эртара. 

УВЕР ЙОГЫН

Каныш кечылаште чеверласеныт

Корно туткарыште колышо-влакым 18 да 19 ноябрьыште тоеныт. Шуматкечын Юрино, Килемар поселкылаште, Козьмодемьянскыште, Курыкмарий районышто 12 еҥ дене, рушарнян Килемар поселкышто эше кум еҥ дене чеверласеныт. Нуным тояш окса республикын бюджетше гыч ойыралтын. Колышо-влакым тойымо вер марте кондаш полышым муницпиал образований ден ял шотан илем вуйлатыше-влак пуэныт.  

УВЕР ЙОГЫН

Чаманымашым каласеныт

Корно туткар лийме деч вара Александр Евстифеев да республикыште илыше-влак лӱмеш чаманымашым каласыман телеграмме-влак пуреныт. Нуным Россий субъект вуйлатыше, Кугыжаныш Думын депутатше, Федераций Совет член-влак, моло колтеныт.

УВЕР ЙОГЫН

Ойго кӱшеш пойынешт

Еҥ-влакын намысыштлан кокланже ӧраш гына кодеш: южышт весын ойгыж кӱшеш шканышт оксам ышташ шонат! Мутлан, тиде аварийыште эмганыше 14 ияш ӱдырлан полшаш оксам погымо нерген социальный кыллаште икмыняр тӱшкаште да сайтлаште увертареныт. Но республикын тазалыкы аралыме министерствыштыже, ӱдырын аважын мутшылан эҥертен, каласеныт: нунын ешыштат, родыштат еҥ-влак деч оксам погаш увертарымашым пуэн огытыл. Сандене МВД пашаеҥ-влак […]

УВЕР ЙОГЫН

Туткар ончылтен кайымылан кӧра огыл лийын

Кугарнян Александр Евстифеев РФ Ространснадзор вуйлатыше Виктор Басаргин дене вашлийын. Оперативный совещанийыште тыгак РФ МВД-н корно лӱдыкшыдымылыкым ыштыме шотышто тӱҥ управленийжын начальникшын алмаштышыже Павел Бугаев, аварий лийме амалым рашемдымашке ушымо республикын тӱрлӧ структур вуйлатышышт  чумыргеныт. 

УВЕР ЙОГЫН

Вуйлатыше шкежат миен

ДТП лийме верыш Марий Эл Республик вуйлатыше Александр Евстифеев миен да туткар кузе лиймым шкежак рашемден.  Тудын дене пырля полиций, МЧС, корно службо вуйлатыше-влак лийыныт. Тыгак Россий транспорт министр Максим Соколов ден Александр Евстифеев ДТП-н кышажым кораҥдыме да туткарыш логалше-влаклан полшымо шотышто телефон дене мутланеныт.   

УВЕР ЙОГЫН

Республикыште – кугу ойго

16 ноябрьыште 17 шагатат пелылан Йошкар-Ола – Козьмодемьянск кугорнын 64-ше километрыштыже, Килемар район кумдыкышто, кугу туткар лийын — «Mercedes Sprinter» микроавтобус ден чодырам шупшыктышо прицепан КамАЗ тӱкненыт. Грузовой машинаште 40 кубометр наре чодыра лийын.