ЯЛ ИЛЫШ

Тораште илат гынат…

Ялын пытен толмо пагытыштыже клубым арален веле огыл, эшеат пойдарен тӱзатымылан, пашажым вияҥден колтымылан ӧраш, куанаш да тидын нерген молыланат каласкалаш веле кодеш. Мутна Волжский районысо Руш Шайра тӱвыра пӧрт нерген.

Тудын вуйлатышыже Нина Ивановна ден аккомпаниаторжо Владимир Павлович Николаевмыт (вате-марий улыт) тӱвыра пӧртын пашажым виктарыме, «Шайра» ансамбльым кумда корныш лукмо деч посна эше клуб кундемыште кава йымалсе тоштерым келыштареныт.

– «Шайра» ансамбль дене республикысе районлаште веле огыл, пошкудо кундемлаштат, йот элыштат лийынна. Верысе калыкын илышыж дене кылдалтше пеш шуко музейым ужынна, сандене меат, ялысе самырык-влак кугезе марий кудо нерген кеч ала-мом да пален налышт, шарнен кодышт манын, кава йымалсе тоштерым почаш кумылаҥна, – манеш Владимир Павлович. – Марий кудым ялысе рвезе-шамыч дене пырля «чоҥенна». Можым шке верештынам, можым калык пуэн, но клуб воктен верланыше озадыме тошто пӧрт гыч поснак шуко арвер ден ӱзгарым конденна, тыгак тушто улшо пырня да оҥа дене шуко мом келыштаренна.

Чынак, марла капкам почын, «кудывечыш», «пӧртыш», «клатыш», «вӱташ» да монь пурет да пуйто кодшо курымыш логалат. Тыште чылажат – шке верыштыже: ала пашаш, ала сӱаныш кычкыме имне, шогавуй, пошлыкым кылдыме сагыле, пу шондык, кровать, этажерке, пӱкен, тӱрлӧ вочко, корзиҥга, ате, шуар, кок тӱрлӧ пиластан, кок тӱрлӧ лӱҥгалтыш, таве, мардеж да кид вакш-влак, шемшыдаҥым солымо сава… Кажныштыже – кугезе айдемын мастар кидше, мотор чонжо, шокшо шӱмжӧ.

Клуб кундемыште дрезине дене кудалше Мустафаланат (икымше марий актёр Й.Кырлалан) верым мумо. Изирак ийготан йоча-шамычлан модмо площадкым келыштарыме гын, вуеш шушо ӱдыр-рвезе-влаклан вычыл-вычыл мутланен але тӱшкан юарлен шинчаш – йытыра теҥгылым. Тыште саваржат шкешотан!

В.Николаев «Шайра» ансамбльлан шоктымо, репертуарым ямдылыме, ял калыкым куандарыме, кава йымалсе тоштерым келыштарыме деч посна эше тӱмырым ышта.

– Тиде семӱзгарым ончыч пеҥгыде пий коваште дене ыштенам, кызыт каза коваштым кучылтам. Рашемденам: пий коваште дене ыштыме тӱмыр яндаррак йӱкан да кужурак ӱмыран, – клубын сценышкыже икте почеш вес семӱзгарым луктын шындылшыжла, пашаж дене палдарыш Владимир Павлович. Да ала 100 ияш, ала эн самырык гармоньжо дене Волжский вел такмак семым туге шупшыл колтыш – йолем кучен сеҥыде, тавашат тӱҥальым. Умылышым: тыгай ура чонан, кидлан мастар, калыклан шӱман еҥ-влак улыт гын, ялысе клуб эше ила да чаплана.

Маргарита ИВАНОВА.

Опубликовать в Одноклассники

Добавить комментарий