МЕР ИЛЫШ

У йӧным кычалыт

Йошкар-Олаште Общероссийский калык фронтын региональный конференцийже эртен.

Тушто тудын чолга еҥже-влак Россий президентын, Калык фронтын ончылъеҥже Владимир Путинын майыште лукмо указыштыже ончыкталтше илышыш шыҥдарышашлык национальный проект ден программылан келшыше  12 направленийым палемденыт. Пашам ыштыме у йӧн-влакым рашемденыт.

 – Кеҥеж пагытыште ОНФ-ын экспертше-влак ты шотышто тӱрлӧ шымлымашым, рейдым, совещанийым эртареныт. Чыла тидым иктешлымеке, ыштышаш пашан у формыжо рашемын. 12 тӱҥ площадке гоч тидым шукташ тӱҥалына. Кажынжлан вуйын шогышо модераторым палемденна, – каласкала ОНФ-ын рӱдӧ штабшын еҥже, Марий Элысе Калык фронтын региональный штабшын сопредседательже Александр Кузнецов.

 Тазалыкым аралыме сферыште ОНФ-н экспертше-влак яллашке медицине специалист-влакым каяш кумылаҥдаш манын икмыняр темлымашым ямдыленыт. Экономикыште сай лектышыш шуаш манын, угыч предприятий-влаклан электроэнергийлан тарифим иземдаш кӱлешлыкым палемденыт.  

Кугу тӱткышым Йошкар-Ола йыр «Ужар щитым» ыштыме йодышлан ойыреныт. Калык фронтын экспертше-влакын ойлымышт почеш, Марий Эл кызытеш чодыра-паркан ужар авыртышым ыштыдыме регион-влак радамыш пура. Сандене нунын темлымышт почеш, тенийсе идалык мучаш марте ты шотышто Марий Элын Кугыжаныш Погынжо посна законым пеҥгыдемдышаш.

 Конференций годым региональный штабын сопредседательже-влак  ыштышаш паша дене радамлын палдареныт. Поснак социальный сферым вияҥдыме проблеме-влакеш шогалыныт, а тиде ола ден районласе калыкын илыш качествыжым саемден колтымо, корно политике, экологий, национальный идентичностьым арален кодымо, самырык тукымым чын ончен куштымо, калыкын граждан чолгалыкшым нӧлталме дене кылдалтше йодыш-влак.

Конференцийын участникше-влакын ойлымышт почеш, кызыт калык деч поген чумырымо йодмаш, темлымаш шотышто у пакет ышталтеш. Тудым варажым регион вуйлатышылан колтат. А тыгай йодмаш, темлымаш дене кажныже ОНФ-ын региональный исполкомышкыжо лектын кертеш.

Конференцийыште тыгак Общероссийский калык фронтын черетан погынышкыжо делегат-влакым сайленыт.

 С.Носова.

Опубликовать в Одноклассники

Добавить комментарий