КУЛЬТУР ДА ИСКУССТВО ТЕАТР

Мыскараче Бусыгин «Сӧсна поминкаш» ӱжеш!

31 октябрьыште М.Шкетан лӱмеш Марий национальный драме театрыште «Сӧсна поминка» спектакль лиеш. Тиде постановкым Марий Эл Республикын сулло артистше Андрей Бусыгин бенефисшылан ойырен налын. Спектакльыште Андрей Витальевич  Васлийын рольжым модеш.

Актёр могай амал дене бенефисым эртара? Спектакльлаште рольым чоҥымо годым молан эҥерта? Изиж годым тудо кӧ лияш шонен. Нине да моло йодышлан вашмутым шкеж дене мутланымеке пален налына.

– Бенефисым могай амал дене эртареда?

– М.Щепкин лӱмеш Кӱшыл театр училищым тунем пытарымеке, 1998 ийыште Шкетан лӱмеш Марий национальный драме театрыш пашаш толынам. Чылажымат теҥгечысе кече семын раш шарнем гынат, тиде жаплан коло ият эртыш. Сандене родо-тукымем, йолташ, поро пошкудо да театрым йӧратыше-влак дене вашлияш эше ик амалым муым. Мутат уке, тынар ий жапыште шуко спектакльыште ролем уло. Чылажат мылам лишыл да шерге. Но комедий кокла гыч тиде постановкым калыкат йӧратен онча.

– Икымше рольдам шарнеда мо?

– «Ачийжат-авийжат» спектакльыште Мичин рольжо. Тиде спектакль кызытат театрын репертуарыштыже уло. Тудо ача-авам пагалаш, чаманаш туныкта, илыш нерген шонаш тарата.

– Спектакльлаште Тендам шукыж годым илалшырак пӧръеҥын, ачан, кочан образыште ужына…

– Эше самырыкем годымат тыгай рольым мылам ӱшаненыт. Мутлан, «Саликаште» Терей кочам, «Мӱкш отарыште» Ӧрӧзӧйым, «Кайыккомбо кашташте» ачам модынам да кызытат ятыр спектакльыште тыгай роль-влак улыт.

– Образым чоҥымо годым молан эҥертеда?

– Артист кеч-кушто коштеш гынат, чыла эскера: пӱртӱсым, янлыкым, кайыкым, еҥым. Мыят тугак. Кочан але илалшырак пӧръеҥын образыштым чоҥымо годым ачамымат шарналтем.

– Комедий сынан персонаж-шамычым модмаште мастарлыкда утларак почылтеш. Кӧн гай мыскара шӱлышан улыда?

– Ачам гармоньым шокташ пеш йӧратен. Тиде мастарлыкше Сергей ден Рудик изам-влаклан веле огыл, мыламат куснен. Мастарлыкым мончаште шуаренам. Изиэм годым Васликугыза лийын коштмо годым мыйым лӱмынак гармоньым шокташ наҥгаят ыле.

– Илышыште мыскарам кучылташ чӱчкыдынак логалеш мо?

– Чӱчкыдын. Илышыште мыскара деч посна илашат ок лий. Но сценыште тыгай рольым модаш куштылгыжак огыл: вет калыкым ӱшандарен моштыман. Роль мыскара сынан гынат, серёзный семынак модман.

– Андрей Витальевич, Моско вузыш тунемаш каяш кӧ темлен?

– Щепкин лÿмеш Кÿшыл театр училищыш, актёрлан тунемаш погымо нерген уверым колмек, шкемым терген ончаш шоненам. Конкурсым моткоч вашке, куштылгын эртенам: гармоньым шоктымем, такмак-влакым мурымем, почеламутым лудмем кызытат шарнем. Моло-влак конкурсым эртен огытыл да шортыныт, а мый – тунемаш пурен кертмемлан. Такшым самырыкем годым ялысе качымарий-влак семын механизатор, тракторист лияш шоненам.

Очыни, аваданат колтымыжо шуын огыл?

–  Ешыште куд йоча кушкынна. Мый – эн изиже, сандене авамын элнан рӱдолашкыже колтымыжо шуын огыл. Оксалан кӧра ачам дене презым  Параньгаш ужалаш намиенна. Тунемаш мийымеке, икымше гана Москвам ужынам.       

– Артистлан тунеммыда вожылмо койыш деч утлаш полшен, очыни?

– Уке, мый кызытат вожылам (воштылеш). Икымше курсышто тунемме годым пийым, пырысым модын ончыкташ кӱлын, а мый вожылынам.

– Шочмо кундемышкыда чӱчкыдынак миен толыда мо?

– Йӧн лийме семын миен толашак тыршена. Шочмо суртна шукертак пустаҥын гынат, мийымем годым, кудывечыш пурен лекде чонем ок чыте. Тунам вара чарайолын модын куржталме, юарлыме пагыт, Ермучаш ялысе плотинаш колым кучаш коштмына да моло пиалан тат-влак ушыш вик пурат. Шочмо мландыш миен толмеке, вий-куат ешаратеш, у пашалан кумыл лектеш.

– Тау вашештымыланда.

– Тау Тыланда. Йодыш-влаклан вашмутым раш пуэн моштен омыл гынат, 31 октябрьыште театрыште вашлийын, тӱрлӧ нерген чоным почын мутланаш амал уло!

Алевтина Байкова мутланен.

Опубликовать в Одноклассники

Добавить комментарий