ЯЛ ИЛЫШ

Чолгалыкышт дене куандарат

Волжский районысо Кугу Корамас тӱвыра пӧрт верысе калыкын кумылжым шукташ тырша.

Тиде ялыште самырык-влак шагалын улыт, нуныштат пашам мӱндырнӧ ыштат. Тыште кыдалаш школ уло, садлан тӱвыра пӧртын кружоклашкыже тунемше да илалше-влак коштыт. Шукерте огыл тунемше-влак ончыч биологий предметым туныктышо Лидия Яковлевна Яндыганова  дене вашлийыныт. Вашлиймаш оҥайын да пайдалын эртен.

Ялысе тӱвыра пӧрт пелен куштышо «Грация», кок драматический кружок (йоча да кугурак-влаклан), республикыште кумдан палыме «Чоткар тукым», «Ош пеледыш» куштышо ансамбль-шамыч, «Самырык тукым» сольный ансамбль, «Аэробика хип-хоп» кружок-влак пашам ыштат. Драматический кружок 1987 ий гыч  пашам ышташ тӱҥалын гын, «Чоткар тукым» ансамбль – 2007 ий гыч. Кружок-влак арнялан  кок гана репетицийым эртарат, а «Самырык тукым» гын южгунам кажне кечын погына. Коллектив-влак шукын улыт, вер шагал, садлан ик шагат дене веле репетицийым эртараш логалеш. Чыла тидын нерген тӱвыра пӧрт вуйлатыше С.Волкова каласкалыш.

– Чодыраял тӱвыра пӧртыштӧ шоҥгыеҥ-влакын  илалше-влакын кечышт дене саламлышна. А вес кечынже пошкудо ялыш, Усолаш, «Чоткар тукым» ансамбль дене мийышна. Усолаште клубым кермыч дене ыштыме. Газ уло, но петырымаште шинча. Тудым жаплан веле почыт. Кызыт клуб колхоз балансыште шотлалтеш. Тӱрлӧ пайрем мероприятийым эртарена. Ынде 4 ноябрьлан ямдылалташ тӱҥалына. Вес районлашкат лектын коштына: Морко, Звенигово, Советский, тыгак Волжск да Казань олалашкат. Транспортым районын тӱвыра отделже пуа, – каласкала Светлана Арсентьевна.

Чодыраял тӱвыра пӧртым 1961 ийыште пу гыч чоҥеныт. Газым пуртен огытыл, кок коҥга веле, садлан телым йӱштырак. Ондак клубышто пу олымбал лийын.  2014 ийыште грантым сеҥен налыныт, шӱштӧ креслым шындылыныт.

2014 ийыште «Воштылаш, товатат сулык огыл» мыскара касыште икымшыш лектыныт, телевизорым модын налыныт. Драмкружок дене М.Рыбаковын «Лыстывий», С.Николаевын «Салика», А.Волковын «Посана» спектакль-влакым шынденыт.

Шорыкйол, Ӱярня, Кугече пайремлан мероприятийым ямдылат. Кажне ийын вашталтышым пурташ тыршат.

– «Чоткар тукым» ансамбльыш 71 ияш Мария Александровна Савинова коштеш, – каласкала С.Волкова. – Мураш пеш кертеш. Ансамбльлан шкеак тувырым урга. Кӱлеш лийме годым тошто шовычым, тувырым, шарпаным мӧҥгӧ гыч кондена.

Ӱшанен кодына: тӱвыра пӧрт умбакыжат калыкым куандараш тӱҥалеш.

Е.Ёлкина.

М.Скобелевын фотожо.

Опубликовать в Одноклассники

Добавить комментарий