СОЦИАЛЬНЫЙ ИЛЫШ

Топ-менеджерын кокла пашадарже – 55000 теҥге!

Боссын кечыже вашеш пашам да персоналым кычалме шотышто HeadHunter сайтын аналитикше-влак Марий Элыште топ-менеджерын вакансийжым кӧмытын чӱчкыдынрак тавалымыштым, пашам пуышын кандидат-шамыч деч мом йодмыжым да тиде сферын еҥже-влаклан могай пашадарым тӱлаш ямде улмыжым рашемденыт.

Ӱмашсе тыгаяк жап дене таҥастарымаште тений январь-октябрьыште Марий Элыште пашам пуышо-влак топ-менеджерын должностьшым 18 процентлан шукырак темленыт. Кызыт шукышт республикым вуйлатыше-шамычлан 55 тӱжем утла теҥгем тӱлаш ямде улыт. Тыгодым пелыже наре тиде должностьыш 1 гыч 3 ий марте паша опытан  кандидат-влакым кычалыт.

Топ-менеджер-влакым чӱчкыдынжӧ ужалыме, изи бизнесым виктарыме, администрирований сферлашке кычалыт. Тӱҥ йодмаш кӱшыл профильный шинчымаш, виктарыме сай опыт, планироватлен моштымо да стратегически шонымо дене кылдалтын.

Вуйлатыме должностьлам утларакше (55 %) пӧръеҥ-влак тавалат. Республикым вуйлатыше ӱдырамаш-влак паша рынкыште поснак 2011-2014 ийлаште чолга лийыныт. Тунам нунын резюмешт чумыр чотын 47 процентшымат вончен.

«Кок тӱжемше ийла тӱҥалтыш гыч республикысе топ-менеджментын рынкыже чот вашталтын. Тунам вуйлатыше ӱдырамаш-влаклан  5 процент марте резюме логалын гын, пытартыш икмыняр ийыште тиде показатель 36 процент деч ӱлыкӧ ок воло. Ӱдырамаш-влак вуйлатышын пашажым палынак чӱчкыдын тавалаш тӱҥалыныт», – манеш Альбина Султанова,  HeadHunter сайтын Озаҥысе филиалжын директоржо.

Топ-менеджерын вакансийжым тавалыше шукырак (42%) пӧръеҥ – 36-45 ияш, ӱдырамаш-шамыч самырыкрак улыт: кугурак ужаш (49%) – 26-35 ияш. Пӧръеҥ-влакын паша опытышт ӱдырамаш-шамыч деч кокла шот дене 10 ийлан шукырак .

Пашам кычалше-влак кокла гыч утларак ужашыже (38%) вуйлатыме должностьышто 50 тӱжем наре теҥге кугыт пашадарым налаш шона, 33 процент – 50 гыч 100 тӱжем теҥге марте.

Тидымат палемдыман: топ-менеджментын ик вакансийжым 6 конкурент тавала.

М.ИВАНОВА.    

Опубликовать в Одноклассники

Добавить комментарий