КУЛЬТУР ДА ИСКУССТВО УВЕР ЙОГЫН

Марий Элын лӱмгечыже вашеш

Йошкар-Оласе Йоча пагыт тоштерыште вашке Историй да археологий дене кылдалтше у экспозиций почылтшаш. Тиде событий 4 ноябрьыште, Марий Элын шочмо кечынже, лийшаш.

Кызыт тушто тидлан ямдылалтме паша кая. Экспозиций кумшо пачашыште вараҥшаш. Тудым Т.Евсеев лӱмеш национальный тоштерын пашаеҥже-влак шке вийышт дене шотыш кондат.

«Тыгай экспозицийым почмаш марий калыкын историйже, археологийже дене кылдалтше тоштерын фондыштыжо аралталтше материалын кугу ужашыжым тӱшка калыклан ончыкташ йӧным ышта. Тӱҥ верыште айдеме- личность лиеш. Садланак шуко манекен, вургем лийыт. Тӱрлӧ пагытыште еҥ-влак мом, кузе чиймым ончыктена. Икымше тӱнямбал сар пагытым кумданрак ончыкташ шонена. Але марте тудын изи ужашыже веле ончыкталтын. Тыгак кодшо курымысо кумылымшо ийлам авалтынена. Тудо пагытысе интеллигенцийын илышыжлан верым ойырена. Козьмодемьянскланат изи ужаш пӧлеклалтеш. Эшежым экспозицийым сылнештарыме тӱрлӧ художественный йӧнымат кучылташ шонена. Садлан тиде ончер тӱрлӧ ийготан да интересан еҥ-влаклан оҥай да пайдале лийшаш, – палдарыш Т.Евсеев лӱмеш тоштерын пашаеҥже Ольга Требушкова.

 С.Носова.

 М.Скобелевын фотожо.

 

Опубликовать в Одноклассники

Добавить комментарий