КУЛЬТУР ДА ИСКУССТВО ТЕАТР

«Чевер мотор пагытем»

28 октябрьыште Марий самырык театрыште Дина Кораблёван пьесыж почеш шындыме «Корнывож пеледыш» спектакль лиеш. Лач тудын дене театрын самырык артистше, Советский районысо Пивахтын почиҥга ялын эргыже Артём Куклин бенефисшым эртара.

Молан лачшымат актёр тиде постановкым ойырен налын? Бенефисым могай амал дене эртара? Тиде да моло йодышлан Артём шкеже вашешта.

Бенефисым эртараш кӧ темлен?

– Майыште кумло ийым темыме лӱмеш бенефисым эртараш шоненам. Сандене тудым «Чевер мотор пагытем» манын лӱмденам. Но шошым театрыш калыкым погаш неле, садлан ты пашам шыжылан коденам. Вет кызыт калык пакчаште пашам пытарен, шуко вере вольыкат кӱтӱш лекмым чарнен, очыни. Икманаш, шыже – театрыште каналташ лач келшен толшо жап.

– Молан лачшымак «Корнывож пеледыш» спектакльым ойырен налынат?

– Тиде постановко тачысе илышлан моткоч келшен толеш. Кызыт ялла гыч  шуко пӧръеҥ кугу оксам кычалын Москош, Озаҥыш але эшеат тора кундемыш стройко пашаш кудалыштеш. Тушто чапле полатым чоҥат, а мӧҥгыштышт капкашт пыкше веле шога (воштылеш). Ялыште ӱдырамаш-влак веле кодыт да чыла пашам ышташ толашат. Тиде спектакльыштат тыгак. Тушто мый ял старосто Кавырля Гаврил Петровичым модам. Роль моткоч оҥай, сандене бенефисыш толшо-влаклан пӱсӧ йодышым тарватыше  постановкынам эше ик гана ончаш темлем.

Марий самырык театрыште мыняр ий пашам ыштет?

– 2004 ийыште Палантай лӱмеш тӱвыра да сымыктыш колледжыш режиссёрлан тунемаш пуренам ыле, но йогыланенам ала-мо (воштылеш) кок ий гыч кудалтен каенам. Самырык-влак семын мыят тӱрлӧ верыш пашаш коштынам. Варажым армийышкат миен толынам. Салтак илыш мыйым изишак пеҥгыдемден манаш лиеш: икмыняр жап тугак пашаш кудалыштмеке, 2012 ийыште ӱдырым налынам, а вара уэш колледжыш тунемаш пуренам да тунамак Олег Геннадьевичын ӱжмыж почеш Марий самырык театрын труппышкыжо ушненам. Коллектив сайын вашлийын. Ынде шым ий утла ты пашам шуктем.

Варажым «актёр мастарлык» пӧлкаш пураш кӧ темлен?

– Самырыкше годым авамат артистлан тунемаш каяш шонен, но шонымашкыже шуын огыл. Сандене тудо эре мыланем ойлен: «Эргым, тунем…». Мыламат тыгай паша келшен. Школышто тунемме годымат тӱрлӧ мероприятийыште мастарлыкым ончыкташ логалын. 

Театрыште икымше рольым могай спектакльыште модынат?

– Зинаида Долгован «Вис-вис пушан орлыкем» пьесыж почеш шындыме спектакльыште Когушын, «На днеште» Бубновын рольжо модынам. Тиддеч вара могай постановко ямдылалте – кажныштыже манме гай ролем уло. Мутлан, «Недоросль»

Тунеммаш да тудо жапыштак пашам ышташ куштылгыжак лийын огыл векат?

– Тунемме годым вашкерак пытарыме нерген, изишак канем ыле манын шонымо. А кунам тунем лектым – мӧҥгешла: жап тетла ок сите. Калыкыште манмыла, кунар пашат шуко, тунар чыла ыштен шуктет. Эше тунам икшывына шочын веле ыле. Чылалан жапым мумо, йогыланен кийыме огыл.

– Кандаш ий жапыште шуко спектакльыште рольым модат. Комедийыште але драмыште сценыш лекташ утларак келша?

– «Кай-кай Йыванлан», «Вишнёвый сад», «Гроза», «Обломов. Теперь или никогда», «Недоросль» да шуко молат. Комедийыште рольым модаш утларак келша, но драме калыкым шонаш тарата. Йоча-влакланат шуко йомакым ончыктена, могай гына образыште лияш пернен огыл?! Содыки икшыве-шамычлан модаш йӧсырак, вет нуным ондалаш ок лий…

– Чурийвылышет дене шемалгырак улат, сандене, очыни, шукынжо тыйым татар але эше вес калыкын шочшыжо улат манын шонат…

– Тидын шотышто шукын йодыт, театрыш толшо-влакат, гастрольышто лийме годымат. Но кугешнен ойлен кертам: мый марий улам. Чурийвылышем – ачам ден авам гай шемалге. Тукымыштына чылан марий улыт.

– Изиэт годым кӧ лияш шоненат?

– Адвокат. 1990-ше ийлаште телевизор дене «Убойная сила» кином ончыктат ыле. Мыланна, школышто тунемше-влаклан, тудо моткоч келшен, сандене шукынжо следователь, адвокат лияш шоненна.

– Тау, вашмутетлан.

– Тау Тыланда. Тидын дене пайдаланен, родо-тукымем ден йолташем, театрым йӧратыше, мыйым палыше да пагалыше-влакым 28-ше октябрьыште пайрем касыш пагален ӱжам. 

Алевтина Байкова мутланен.

(Фотом театрын архивше гыч налме.)

Опубликовать в Одноклассники

Добавить комментарий