КУЧЕМ УВЕР УВЕР ЙОГЫН

Пайда лийшаш

Беларусь ден Российысе регион-влакын визымше форумышт годым Марий Эл Республик вуйлатыше Александр Евстифеев «МАЗ» ОАО-н  «Могилёвтрансмаш» заводыштыжо – «Белавтомаз» холдингын управляющий компанийыштыже – лийын. Тушто тудо предприятийын лукмо продукцийжын ончерже дене палыме лийын.

Завод заказчикын йодмыж почеш тӱрлӧ моделян автомобильым луктеш.  Уна-шамычлан ончыктымо модель-влак коклаште автобус, грузовой, специальный, коммунальный да прицепан технике лийыныт. Тыгак заводын технический службыжын конструкторжо-влакын ямдылыме у продукцийже-шамычат ончыкталтыныт.

 Российысе делегаций дене пырля Александр Евстифееват «МАЗ» пассажир-влакым шупшыктышо техникын кызытсе жаплан келшен толмыжым да йӧнан улмыжым аклен кертын.

Тыште ушештарен кодыман, 11 сентябрьыште Марий Элыш Россий Федерацийыште Беларусьын посольствыжын Озаҥ оласе пӧлкажым вуйлатыше Олег Исаев толын коштын ыле. Тунам Беларусь велым пассажир транспорт сферыште ваш келшен пашам ыштышаш нерген темлымаш йоҥген. Минскысе автомобиль заводын продукцийже денат палымым ыштеныт.

А Беларусьышто эртыше форумышто Александр Евстифеев «Союзный кугыжанышын тӱнямбал кӱкшытыштӧ пашам ыштымыже да экономический лӱдыкшыдымылыкышт» секцийын пашаштыже участвоватлен. Тудым РФ Федеральный Собранийын Тӱнямбал паша шотышто комитетшын председательже Константин Косачев эртарен. Белорус велым мутланымашын модераторжылан Республик Советын тӱнямбал паша да национальный лӱдыкшыдымылык шотышто эре ыштыше комиссийын председательже Сергей Рахманов лийын.

Заседанийыште  Россий ден Беларусь коклаште тӱнямбал кӱкшытыштӧ ваш келшен илыме, Союзный кугыжанышын экономический ден информационный лӱдыкшыдымылыкшӧ, конкурент-влак дене таҥасен кертше манын, единый образовательный да научно-технологический кумдыкым,  наукоемкий производствым ыштыме нерген мутланеныт.

Марий Эл Республик вуйлатышын организаций да аналитике виктемжын уверже негызеш С.Носова ямдылен.

Опубликовать в Одноклассники

Добавить комментарий